top of page

Pagpatugdok pumping stations kan MNWD pendiente sagcod dai nakakaimplementar nin dugang na tarifa

Apektado an programa kan Metro Naga Water District (MNWD) sa Ciudad nin Naga sa planong pagpatugdok nin dugang na mga pumping station sagcod na dai pa na-aaprubaran an saindang petisyon sa water rate increase.


Kan bulan pa nin Enero 2023 nagsumiter nin petisyon nin dugang na tarifa sa tubig sa Local Water Utilities Administration (LWUA) alagad anom nang bulan dai pa nin aksyon an LWUA an resulta apektado an saindang pigtalaan na proyekto na saro sa preparasyon sa panahon kan El Niño.


Si Acting General Manager Florencio Mongoso Jr. nagpahayag matapos kan anom na bulan pendiente an saindang petisyon igwa naman nin hinahagad an LWUA nin dagdag na rekisitos.


Saro sa nakaabala afuera sa dugang na mga kaipuhan na papeles iyo an pagnombra ni Presidente Ferdinand Marcos Jr. nin bagong Chairman kan Board of Trustees.


Sa ngunian an minimum na tarifa kan water district cantidad P125.00 alagad sa petisyon hagad an dagdag na P30.00 na magiging nang P160.00.


Siyam nang taon mayong dugang na tarifa asin panahon nang aprubaran kan LWUA nganing mapakarhay an mga facilidades asin dugang na pumping station.


An MNWD bako lang sa Ciudad nin Naga envez sakop kan saindang serbisyo sa potable water iyo an pagtaraid na banwaan kan Magarao, Canaman, Camaligan asin Gainza.


An manijamiento dai pa lang nahahaloy nakahawas sa pagkalugi alagad sa temporaryong pagtukaw ni Mongoso luway-luway na nakabangon.


Kun hahapoton an mga consumedores nin tubig pabor sa sainda na maabala an implementasyon kan dugang na tarifa. (dpa)

Comments


bottom of page