top of page

PAGPUHO SA JUETENG/STL: Trabajo kan law enforcement, jefe ejecutivo kan Naga-PCSO

Yaon sa law enforcement asin jefe ejecutivo kan Ciudad nin Naga kun mawot ipapundo an operasyon kan ilegal na sugal na jueteng maging an Small Town Lottery (STL).


Si PCSO Provincial Manager Jobet Ramos, nagpahayag kaini sa Bicol Mail sa paagi nin telepono matapos liwat naman siyang maging bisita kan Martes, Febrero 7, 2023 sa ika-29 sesyon regular kan 14th Sangguniang Panlungsod sa isyu kan STL/jueteng na dai matapos-tapos apesar kan nakaaging 13th Sangguniang Panlungsod naging bisita siya sa kaparejong nagdadanay na ilegal na sugal sa ciudad.


Si Alcalde Nelson Legacion, enot nang nagpahayag sa media na igwa na siyang orden sa NCPO na darakopon an ilegal na mga kolektor sa ciudad.


Maging kan enot kaining termino bilang jefe ejecutivo nagpahayag na kontra siya sa operasyon sa ciudad kan STL asin jueteng.


An isyu sa jueteng o ilegal na koleksyon sa STL pigbuyagyag ni Consejal Salvador Del Castillo sa privilege speech sa SP regular session huli ta langtadan na sa mga barangay mala ngani kinumfirmar pa ini ni Punong Barangay Pedro San Juan Jr. kan Barangay Balatas na sa saiya sanang barangay nagpapadagos an koleksyon sa STL/jueteng saka nangyayari man ini sa iba pang mga barangay kan ciudad alagad tolong taon na sa ngunian padagos an ilegal na sugal.


Si Consejal Jose Perez nagpahayag na kun tolong taon na an STL, duda siya na sugal na jueteng an nangyayaring operasyon sa ciudad.

Si PB Pedro San Juan Jr. kan Brgy. Balatas nag-aatubang sa sesyon regular kan SP nganing kumfirmaron an talamak na koleksyon kan ilegal na STL/jueteng sa Ciudad nin Naga. (SP FB Page)


Sinabi pa ni Del Castillo dapat dai magdanay an STL sa Naga mantang mayong franquicia an PCSO asin pig-uyonan man ini ni PCSO Manager Ramos. Huli kaini, ilegal na sugal an sinambit na koleksyon sa STL man o jueteng.


Pigpahayag pa kan PCSO Camarines Sur nag-isyu nin franquicia an PCSO main office para sa Camarines Sur dai kabali an ciudad. An permit pig-isyu sa Even Chance Gaming Corporation na an ‘‘Draw Court’’ o betting station namumugtak sa Pili, Camarines Sur.


Afuera ki Ramos, PB San Juan kabali pa sa naging bisita sa sesyon kan SP iyo si City Director Col. Nelson Pacalso kan Naga City Police Office na pinauranan nin mga hapot kan miembros kan consejo kun ta’no ta dai napopondo an ilegal na sugal sa ciudad.


Liwat siyang nagpangako laban sa ilegal na sugal alagad saiyang pinaliwanag na igwa na sindang enot na 20 correador na nagkadarakop asin kinasohan.


An PCSO Camarines Sur matolo nang taon naghurot sa NCPO na ipapondo an nagpapadagos an ilegal na STL sa Naga alagad sagcod sa ngunian nagdadanay. (dpa)

Comentarios


bottom of page