Pagrehistro kan vehiculo dawa sain na LTO district office, sabi

An arin man na vehiculo dawa sain puedeng magpa-inspect sa duwang Private Motor Vehicle Inspection Center (PMVIC) asin dawa sain magparehistrong district office kan Land Transportation Office (LTO) sa Camarines Sur.

Si director Francisco Ranches kan opisina rehiyonal kan LTO Bicol nagpahayag na dawa igwang designadong coverage kan General Area of Responsibility (GAOR) mayo sindang reglamento maging an Department of Transportation (DOTr) kun saen dapat magrehistro asin mag-renew kan vehiculo.

Duwa sana an PMVIC sa Camarines Sur na namumugtak sa Pamplona asin sa Pili alagad igwang designadong GAOR an LTO.

An PMVIC sa Pili, CamSur sakop kan GAOR digdi iyo an mga banwaan sa Partido area, Ciudad nin Iriga asin mga banwaan sa Rinconada area asin sa Ciudad nin Naga, mantang an Pamplona PMVIC kabale sa saindang GAOR iyo an Ciudad nin Naga, Ragay asin mga banwaan sa premir asin segundo distrito.

Digdi sa Bicol an Camarines Sur iyo pa sana an igwang duwang PMVIC asin sa dai mahahaloy isusunod an Daet, Camarines Norte asin sa Ciudad nin Sorsogon alagad an nakakasakop sa sainda iyo an DOTr, sabi pa ni Ranches.

An LTO Bicol nag-inspeksyon na sa duwang PMVIC sa Camarines Sur huli kan mga reclamo kan nagpapa-inspeksyon na vehiculo mala ngani dakul an mga nagbabaragsak aroaldaw asin igwang reparo na dapat mabago sa inspection center na ipapaabot kan ahencia sa opisina central kan DOTr, segun pa ki Ranches.

An PMVIC computerized an saindang pag-inspeksyon sa mga vehiculo na nasa veinteng item an saindang pigheheling kabale an ilaw, busina, break light, chassis, gulong, break asin iba pa nganing maseguro na marhay an dalagan kan saindang sasakyan sa tinampo sagcod sa seguridad kan pasajeros asin tsuper, segun pa sa LTO. (dpa)