Pagsabat kan 2021 matuninong-PNP CSur

Naging matuninong an paz y orden sa Camarines Sur si pagsabat kan bagong taon 2021 asin si selebrasyon kan ika-52 na aniversaryo kan Communist Party of the Philippine (CPP) kan Deciembre 26 sa tahaw kan naka-alerto an PNP asin 9th Infantry Division kan Philippines Army sa provincia.

Sa pagsabat kan bagong taon, sinabi ni P/Major Louie dela Peña jefe kan Police Community Office kan PNP Provincial Office kan Camarines Sur malinig an mga pigsumiter na police blotter kan mga Municipal Police Station sa provincia.

Pigpahayag pa na nakatabang an advocacia kan Departamento de Salud na dai na magpaputok nin rebentador sa pagsabat kan Pasko asin Bagong taon nganing malikayan an disgrasya.

Mayong insidente nin ‘‘indiscriminate firing’’ mantang kulang si purutokan nin rebentador na apektado pa kan pandemya asin padagos na pagbulos nin uran.

Antes kan Pasko asin aniversaryo kan CPP kan Deciembre 26, 2020 kan yaon pa sa puesto si dating Provincial Director P/Col. Roderick Roy naka-alerto na an mga MPS sa posibleng paghasok nin kariribokan kan CPP/NPA.

Si P/Col. Bernard Perez, bagong provincial director kan PNP CamSur nakaasumir na sa puesto antes kan bagong taon sagcod na padagos niyang pig-alerto an kapupulisan nganing maseguro an dalagan kan paz y orden sa pagsabat kan 2021.

Sa 9th Infantry Division kan Philippine Army na may base sa Camp Elias Angeles, San Jose, Pili, Camarines Sur pigpahayag na dai nakabuelo an grupo kan CPP/NPA sa planong paghasok nin kariribokan sa aldaw kan saindang aniversaryo mantang naka-alerto an miembros kan militar.

Sinabi ni Army Capt. John Paul Belleza na nagwarak sinda nin mga soldados nganing dai makapalag an rebeldeng NPA asin dakulang bagay nganing mamantenir an paz y orden sa Camarines Sur. (dpa)