Pagsabat kan bagong taon matuninong - PNP

An pagiging alerto asin pagwarak nin kapupulisan sa mga simbahan, malls, pantalan, terminals saka sa matawong mga lugar dakulang bagay nganing mamantenir an paz y orden sa pagsabat kan bagong taon.

Ini an tasascion kan Camp Simeon Ola sa pamamayo ni Acting Regional Director BGen Andre P. Dizon, kasabay na digdi an saiyang pagbibisita asin inspeksyon sa mga Municipal Police Station tanganing macierto an kahandaan sa ano man na remalaso.

Padagos an saiyang mga directiva sa mga operasyon laban sa kriminalidad sagcod na nagkakadarakop an suspek sa saindang inatubang na caso.

Alagad sinabi pa ni Dizon sagcod ngunian na semana magpapadagos an saindang alert status bilang pag-andam sa mga mapasiring sa terminals, pantalan, asin aeropuerto.

An rehiyon cinco nakakurit nin 31 biktima nin rebentador na gamit an piccolo, saro an biktima, sampolo sa 5 star, duwa sa giant whistle bombs sampolo sa boga, duwa sa quitis, asin walo pang iba siring kan mga naaksidente sa fountains, sprinklers asin recycled pulbura.

Alagad antes kan Pasko, sarong caso sa ‘‘illegal discharge of firearms’’na envuelto an sarong personaje kan AFP na tolos man sinangatan nin casong pagbalga sa slight physical injuries and grave threat mantang nakabayad man tolos nin piyansa an acusado.

Saludo an jefe kan PNP Bicol sa performance kan Directorate for Operations matapos 562 na boga an saindang nakumfiscar.