Pagsuspende sa pag-angkat nin bagas pabor sa paraoma

Pinapaboran kan National Food Authority (NFA) sa Bicol an pinaluwas na directiva ni Presidente Ferdinand Marcos Jr. na pondohon ngona an pag-angkat nin bagas sa ibang nasyon nganing paborable sa paraoma na maglangkaw an presyo kan paroy sa mga kumprada.

Nagtutubod man kaini si NFA assistant regional manager Julie Llenaresas mantang kun padagos na maglalaog sa nasyon an imported rice apektado an presyo kan paroy kan paraoma alagad kun mayong imported rice ciertong maglalangkaw an presyo kan paroy hale sa paraoma.

An pahayag na ini ginibo sa atubangan kan miembros kan media sa Kapihan sa Bagong Pilipinas kan PIA Bicol na presente man si director Imelda Galinao kan Department of Labor and Employment sa Bicol.

An pagbaba kan presyo kan paroy sa mga pribadong kumprada nagresulta man sa aroaldaw na pila nin mga paraoma na nagpapabakal paroy sa ahencia mantang mas halangkaw an presyo.

An pagpapondo kan pag-angkat nin bagas ni Marcos epektibo sa Septiembre hasta Oktubre 2025 na bulan nin aranihan, sabi pa kan NFA.

Sa kaparejong press conference sinabi man ni DOLE Director Galinao na maabot sa cuartro mil na low-income earners sa rehiyon an benipisyaryo kan pinapabakal na presyo sa lindong kan P20 rice program.

Sa datus kan ahencia sinabi kaini, na kan Hulyo 31, 2025 abot na sa 4,054 na mga ordinaryong empleados nakabakal kan baratong presyo kan bagas.

Dinagdag pa kan DOLE Bicol na ngunian na bulan nin Agosto 2025, target ninda na sundo sa 17,000 na mga empleados an makikinabang kan ‘’Benteng Bigas Program.’’

Sinabi pa kan NFA na an bagas na saindang pinapabakal hale man sana sa paraoma na binabakal kan gobierno.