PAGTANGGAL VS LAUNSING BINAGAT KAN TRO: Junta kan MNWD naghugas kamot sa pagbakal lote, sabi
Naghugas nin kamot an junta directiva kan Metropolitan Naga Water District (MNWD), kun an general manager sana an tinutukdo na responsable sa pagbakal nin P81 milyon pesos na cantidad nin lote sa barangay Mabulo asin Balatas sa Ciudad nin Naga.
An mga empleados nagtutubod na saro sa causa kan tolong taon nang pagkakalugi kan water district huli kan milyones pesos na binakal na lote na dai paman napapakinabangan asin dai dapat enterong ibasol sa none revenue water (NRW).
Si General Manager Engr. Virgilio Launsing na balik sa puesto sa MNWD matapos makakua nin temporary restraining order (TRO) hale sa corte contra sa desisyon kan junta directiva na dagos nang sinipa siya sa serbisyo kan Marso 15, 2022 huli sa ‘‘lost of trust and confidence’’ nagbuyagyag na dai niya sinulo an transaksyon sa pagbakal nin cantidad P28 milyon na lote sa Sitio Pagdahicon, brgy. Mabulo asin P53 milyon na lote sa barangay Balatas mantang kabale sa mga signatories sa pagbakal kan magkasuhay na lote iyo an Board of Directors asin Finance Manager.
Dai mangyayari kun dai ninda aprubado sa paagi nin resolusyon an pagbakal kan sinambit na lote sa pamamayo kaidto ni BOD Chairman George Palma asin an iba pang mga directors na sinda Marilisa Ampoan, Monica Lily Claveria, asin Agileo Michael Pauig, sabi pa ni Launsing.
Sa enot na resolusyon kan junta sa pitong aldaw na preventive suspension contra sa general manager an isyu sa pagbakal nin mga lote sa Mabulo para sa Bicol River Water Surface Treatment Plant Project mantang an lote sa barangay Balatas para sa expansion office kan MNWD alagad mayo man palang fondo an water district mala ngani sagcod sa ngunian nakatiwang-wang an controvercial na lote.
Ano man na programa asin plano kan manijamiento naagi sa junta asin an general manager iyo an na-implementar, sabi pa kan general manager.
Balik bilang general manager si Launcing puon kan Lunes, Marso 21, 2022 mantang narecibi niya an order kan corte kan Viernes na hapon, Marso 18, 2022 matapos magsangat siya nin petisyon sa RTC Branch 23 kan Hall of Justice sa Ciudad nin Naga huli sa pagtubod niya na dai nag-agi sa due process an aksyon kan junta directiva na dagos nang taposon an saiyang serbisyo sa water district.
Status quo an saiyang pagbalik mantang nakatalaan bistahan an saiyang application for preliminary sa maabot na Marso 24, 2022 na dapat yaon an presencia kan mga respondiente sa caso asin kan petitioner.
Sa lado kan junta, sinabi ni Chairman Gilbert Albero na saindang pigrerespeto an desisyon kan jusgado mantang saindang rekonosido an pagbuelta sa puesto kan GM. (DPAureus)