Pagtao nin komendasyon sa NCPO, PDEA sinikwal na sa SP

Iginilid na kan Sangguniang Panlungsod sa Ciudad nin Naga an ano man na propuestong resolusyon na nagtataong komendasyon sa arin man na miembros kan awtoridad na nakasiod kan mga envuelto sa ilegal na droga huli ta saindang trabajo na magdakop kan mga envuelto sa kriminalidad orog na sa ilegal na droga.


Ini an panindugan ninda retiradong PNP Brig General, Consejal Melvin Ramon Buenafe, Consejal Jose Perez, Consejal Ghiel Rosales, Consejal Salvador Del Castillo asin iba pa.


Kabali pa sa dahilan na igwang nagkakadarakop sa ilegal na droga, alagad an ibang caso huli sa kawaran nin pusog na evidencia binabasura kan jusgado.


An desisyon kan SP kasunod kan propuestong resolusyon ni dating Liga ng mga Barangay President asin ngunian regular na miembro kan consejo Antonio Beltran na naghuhurot na dapat tawan nin komendasyon an arin man na mga opisyal kan Naga City Police Office (NCPO) asin Philippine Drug Enforcement Agency (PDEA) na nakadakop kan mga envuelto sa ilegal na droga.


Nganing mas matawan nin high moral an miembros kan NCPO o PDEA maninigo sana an komendasyon sa sainda, sabi pa ni Beltran.


Si Consejal Del Castillo nagpahayag pa na igwang mga darakulang personalidad an nadadakop alagad nakakaluwas sa carcel matapos dai maprubaran sa corte an caso.


Saiyang pighalimbawa, saro sa bantogan kaidto sa ilegal na droga sa Ciudad nin Naga asin Bicol, iyo si Victor Lorenzo ‘‘Chinglo’’ T. Rosales na nag-atubang nin caso sa pagbalga kan Comprehensive Dangerous Drugs Act of 2002.


Sa desisyon kan Corte de Apelasyon nag-orden nin ‘‘acquittal’’ kan pigsasabi lider kan drug cartel sa rehiyon Bicol.


Segun sa CA an mga operativa ‘‘did not properly mark the illegal drugs seized in the room of Rosales, that there was a shroud of doubt as to the identity of the drug evidence’’


Magigirumduman, kan activo pang miembros kan SP si dating Chief of Police Jose Tuazon saiyang pigkontra an komendasyon sa PNP o PDEA kun nakakadakop sinda nin mga envuelto sa droga huli ta parte ini kan saindang trabajo.


Kan nakaaging komposisyon kan SP igwa nang enot na mga komendasyon sa PNP asin PDEA alagad ngunian na 14th SP dai na mangyayari. (dpa)