top of page

Pagtapyas tarifa sa kuryente kan Casureco II madidiskaril

Namemeligrong magpalyar an manijamiento kan Camarines Sur II Electric Cooperative (Casureco II) Inc. na iimplementar an pagtapyas kan tarifa sa kuryente sa laog kan premirong cuarto ngunian na taon.


Dai pang kasegurohan na makasuplay na kan 10 megawatts (MW) power supply sa Casureco II an Power Sector Assets and Liabilities Corporation (PSALM) mantang igwa pang nagkaperang cooperativa nin electricidad sa Bicol an naglaog na sa kasundoan sa kaparejong power supplier sa pagpabakal nin kuryente kan Oktubre 2022 alagad sagcod sa ngunian dai pa narerealisar.


Saro pa sa puedeng mangyari an pinaluwas na press release kan City Hall na igwa pang 20MW na dugang power supply alagad dai pang kasegurohan mantang magninipis ngani an suplay kan kuryente.


Posibleng sa bulan pa nin Mayo 2023 alagad dai pang kasegurohan.


Ini an mga pahayag ni Rinner Bucay, opisyal na parapahayag kan Casureco II sa tahaw kan enot na piglalaoman na matapyas sinda nin on peso cada kilowatt hour sa consumo kan miembros-consumedores matapos kan saindang ‘‘agreement’’ na mabakal sinda nin 10 MW sa PSALM.


Enot nang piglalaom kan cooperativa na mababa an tarifa mantang an sinambit na power supplier hababa an generation cost, na nagcacantidad sana nin P5.00 cada kilowatt hour (kWh) kumpara sa ibang supplier na nagaabot sa P12.00


Dinagdag pa kan Casureco II na bako sa gabos na oras malaog an power supply kan PSALM asin saro pa sa piglalaoman na problema.


Sinabi pa na saro sa saindang aatubangon iyo an pagnipis kan suplay nin kuryente sa Luzon sa mga bulan nin summer nakabali digdi sa Bicol. An mangyayari sasapoon naman an mga rotational brownout.


An Department of Energy iyo an nagpaluwas nin patanid na maresulta man sa paglangkaw kan presyo kan generation cost kan mga planta asin babawion ini sa mga cooperativa nin electricidad sa paagi nin pagsingil nin dugang na tarifa.


Sa presente an tarifa kan cooperativa nag-aabot sa P15.4490 hasta P17.3085.


An dahilan sa pagnipis kan kuryente huli ta dakul an nagkukunsomo kun panahon nin summer sagcod na apektado man an mga planta.


Alagad an solusyon digdi magtipid nganing malikayan an halawig na mga brownout, sabi pa ni Bucay. (DPAureus)

bottom of page