top of page

Pagtransportar kan buhay na orig dapat ibawal na kan LGUs - MVA

An Meat Vendors Association (MVA) sa Naga City People’s Hall hinahagad na sa lokal na gobierno kan Ciudad nin Naga maging iba pang LGUs na dai na mag-isyu nin special permit sa mga viajero nganing magbakal nin buhay na orig asin i-transportar sa Manila asin sa iba pang rehiyon.


An resulta kaini kun dai mapupugolan kan LGUs an apektado iyo an consumedores huli ta halangkaw an presyo mantang kulang an suplay kan hayop.


Ini an mga pahayag sa media ni Ms. Rose Nicolas, president kan MVA sa tahaw kan padagos na paglangkaw kan karning orig sa mercado publico sagcod nadidificilan sinda sa paghanap nin mababakal na bunoon na orig mantang haros trak-trak cada semana an pigtatransportar na hayop na hale sa Naga asin pagtaraig na banwaan.


Apesar kan problema sa suplay nagiging estricto pa sainda an LGU na dapat igwang veterinary permit asin magkua pa nin permiso sa Department of Agriculture sa pagbakal nin buhay na hayop.


An rehiyon Bicol apektado kan African Swine Fever (ASF) na saro sa mayor na dahilan kan pagkulang-kulang nin suplay sa mga mercado.


Sa ngunian nagcacantidad na nin Php340 hasta Php350 an cada kilo mientras na si dati nindang ordinaryong parukyano dai na nagbabakal kan karne huli ta nagpara-mahal an presyo.


An Department of Agriculture (DA) sa Bicol enot naman nag-aapelar sa LGUs na magpasar nin ordinansa nganing ma-regulate an pagtransportar kan mga buhay na orig hale sa Bicol pasiring sa ibang rehiyon.


Mayong kontrol an DA nganing ibawal an pag-viaje kan ginatos na buhay na orig na trak-trak cada semana nganing darahon sa Manila asin sa iba pang rehiyon.


Sinabi ni Emily Bordado, opisyal na parataram kan DA Bicol na kun dai makokontrol kan LGUs an padagos na pagluwas kan buhay na orig an apektado iyo an suplay kan karne sa mga mercado.


Napag-aram kan BM an lokal na gobierno pa sana kan Tinambac, Camarines Sur an dai na nag-iisyu nin special permit sa viajero nganing dai ma-apektaran an suplay kan karne sa mercado.

bottom of page