Pailaw sa Pasko sa Partido Area amay na nagliwanag
Ni Sonny Malate
San Jose, Camarines Sur --- Primerong aldaw pa sana kan Deciembre, duwang gayong banwaan sa Partido Area an magkasabay na naggibo kan lights on ceremony para sa saindang ilaw-ilaw sa Pasko 2023.
An Christmas Village sa San Jose Partido na nasa ikaduwang taon na, liwat na nagtao nin dagdag na kaogmahan asin dinagsa kan mismong residentes asin mga dayuhan digdi.
Si Alkalde Jerold B. Peña labi-labi an kaogmahan nin huli sa marhay na panahon durante kan paggibo kan lights on activity. Maroromdoman na kan mga nakaagin semana pirming mauranon sa ikaapat na distrito kan probinsiya.
Segun sa alkalde, an Christmas Village magigin permanente nang tampok sa banwaan na ini bilang pagrokyaw kan espiritu kan Kapaskohan asin pagmawot kan local na gobyerno na makadara nin dugang na color asin kaogmahan sa residentes saka mga dayohan.
Nagtaong sustancia sa actividad iyo an Istorya kan Pinakaenot na Pasko na pigheras ni Rev. Fr. Luisito A. Occiano, Cura Paroco kan Parroquia ni San Jose.
An municipal hall kan San Jose Partido nagliwanag sa ilaw-ilaw kan Pasko. (Photo: LGU San Jose/ John dela Cruz Flores)
Nagin dakula man na inspirasyon sa mga namamanwaan an pakadangog primera vez kan Christmas ID song kan banwaan na may titulong «Paskong San Jose Partido» sa paagi kan SJP Serenata asin Alkalde Peña. Ini nahimo ninda Frank Hermie Mabana, Mark Ulrey Ortiz asin Shena Eleanor Agnas.
Nagdara nin liwanag sa kalangitan an fireworks display na nagdurar nin pirang minutos na sinabat nin kaogmahan orug na kan mga kaakian.
Sa Deciembre 8, magigin dugang na kaogman man iyo an Christmas Village asin Banchetto sa Patio kan Archdiocesan Shrine of St. Joseph. An actividad na may temang «Pasko sa Banwa Asin Parokya,» pigtuturuwangan kan local government unit, Parroquia ni San Jose asin San Jose Partido Chamber of Commerce and Industry.
Manonotaran na kan Deciembre uno kasabay man na binukasan sa publico kan local na gobyerno kan Goa sa pamamayo ni Alkalde Marcel S. Pan an celebrasyon kan Pasko na may temang «Paskong Matinao, Paskong Goàño.»
Pambihirang tampok sa laguerta kan edeficio municipal iyo an higanteng Christmas tree, an 2,300 na puting led tulips, libreng film showing asin Christmas Bazaar na sarong patotoo sa banwaan nin Goa bilang centro kan comercio asin progreso sa Partido Area.
Mientrastanto, kasurunod man na naggibo kan lights on activity sa saindang pailaw sa Pasko iyo an Lagonoy kan Deciembre 2, asin Tigaon, Deciembre 4.
Linalaoman na mantang nagrarani an mismong aldaw kan Pasko, an iba pang banwaan sa Partido Area malatag naman kan saindang pailaw bilang pagrokyaw kan espiritu kan Kapaskohan