Paka-Fiesta

An mga gurangan na Bikolano asin Bikolana na dae pwedeng mag-iba sa prosisyon o sa sakay ni Ina, dae na ngani pwedeng magdalan ta matawo, maski maki-kakan dae na pwede ta bawal an karne pero aktibo pa an debosyon ki Ina maski sa laog kan harong na sana.

Ara pa man kuta na magsakay sa telebong pero i-paonra na lang sa mga juvenes asin mga aki. An pista ngonyan sa Naga bako na lang pating sarong semana kundi sarong bulan na baga.

Huli sa agyat kan turismo bako lang mga Bikolano an nagdadayo sa dating ciudad de Caceres o Naga City kundi mga dayuhan hali pa sa America, Europa asin iba pa na minabaraba na sa Bikol International Airport sa Daraga bago magbiyahe nin 2ng oras pa pasiring sa ciudad nin Naga. Mahihiling mo sa mga posts asin sa mga bareta sa telebisyon, milyones na an nagparticipar sa Traslacion paghatod kan Imahen ni Ina hali sa Basilica pasiring sa Cathedral.

Orog na sa sakay kun Sabado, an aldaw nin ka-fiestahan.

Kaya an mga debotos na aguit-aguitan poon pa kadto alagad gururang na ngonyan dae na makaruluwas pa sa harong. Maski maglakaw-lakaw sa centro nadidipisilan na sinda huli nalang ta kadakul nang mga awto sa tinampo, mga motor, tricycle nadagdagan pa kan mga e-trike sa tinampo. An fiesta bako nang para sa mga gurang.

Kun madalan Traslacion, sakay, parada, sa telebisyon na lang, sa radyo o sa social media bako pang mainiton.

Imbes na maki-dula sa fiestahan padarahan na lang nin patos si lolo asin si lola maski bakong karne ta bawal na an mga iyan sa mga may edad.

An pagsimba pwede na sa radyo, sa TV o sa cellphone bastang udok sa boot an pangadeion.

Bako lang mga gurang kundi pati mga aki kun pwede dae na nguna paruluwason apuera sana sa carnabal asin ibang kawatan.

An suhestyon kun harayo pa an fiesta magsungko na sa Basilica o Cathedral o Peήafrancia Shrine ta dikit pa an tao asin bakong suru-suan pag-hadok ki Ina.

Kun aldaw nin Sabado antes kan sakay iyo an punsyon sa centro asin ibang parte kan Naga apuera kan Francia, Calauag, San Felipe na guiniguibo an karakanan pag-otro aldaw na Domingo.

Saro pang suhestyon, an mga taga-Magarao, Canaman, Camaligan, Milaor, Bombon, Pili, Ocampo dae na maki-agawan sa karakanan sa Naga mag-pwesto na man lang sinda ta parte pa sinda kan Peήafrancia Fiesta.

Sa paaguing iyan maiina-inaan an mga tao sa Naga asin maguiguin mas solemne an okasyon.

Mabuhay si Ina!