PAKATAPOS KAN ELEKSYON: Hospitals sa Bicol preparado kunliwat maglangkaw an Covid cases

An mga pribado asin gobiernong hospital sa Bicol preparado na encaso liwat naman magbungkaras an numero kan coronavirus disease (Covid-19) matapos kan eleksyon nasyonal asin lokal.


An Department of Health (DOH) sa pamamayo ni regional director Ernie Vera nagpahayag na kan saindang kaandaman sa huma kan virus kasunod kan mga ginibong political rallies na haros dai nasusunod an social distancing na mandato kan national IATF.


An lambang tiripon kan arin man na partido political huli kan ribo-ribo mga nag-aatendir dai na kayang maimplementar kan awtoridad an social distancing.


An Private Hospitals Association of the Philippines nagpangako sa DOH kan saindang kaandaman kun magsipa an caso kan Covid-19 matapos kan pirilian.


Ipinahayag na haros zero na sa caso sa Covid-19 sa mga pribadong hospital sa Kabikolan maging man sa hospital kan gobierno bibihira na an piglalaog na pasyente sa virus, alagad an Covid wards perming nakahanda sa pasyente.


Alagad nagpatanid si director Vera sa publico na dawa nasa Alert level 1 na an kadakle sa mga provincia sa Kabikolan kaipuhan magsunod sa health protocols orog na sa pagsulot nin face mask.


Pigseguro na kan mga hospital na gabos nindang health workers sa pribado asin sa gobierno mga bakunado na asin inabot na kan booster shots.


An DOH asin national IATF iyo an nagpaluwas nin patanid sa publico na posibleng maglangkaw liwat an caso kan Covid-19 matapos kan eleksyon.


Huli kaini, padagos an saindang programa sa bakunahan mala ngani sagcod na sinda sa pediatrics vaccination.


An halangkaw na porcientaje kan mga bakunado sa Bicol dakulang bagay nganing magbaba an caso asin dai maulakitan kan virus, sabi pa kan DOH. (dpa)