Pakikilimos kan Badiao bakong hanapbuhay, sabi

Perang aldaw antes kan kapaskohan nagdadakul an grupo kan Badiao sa Ciudad nin Naga ngani sanang makilimos alagad bako gabos sa sainda iyo an hanapbuhay ‘‘envez’’ namamasko sana.


Sa entrevista kan Bicol Mail sa saindang lider, Jilael Bobsoler Sawalani, 49 anyos may agom saiyang piglinaw na kun nagtutuyo sa Naga an saindang grupo nadagsa sana digdi limang aldaw antes kan Deciembre 25.


Alagad iyan kaogmahan kan familia na nakakabisita sa ciudad asin dagos nang namamasko.


Dai ninda kinakasupog an pakikilimos huli ta bako man ining paghabon asin kaogmahan pa kan saindang aki na nakakalibot sa ciudad.


Digdi sa Camarines Sur kadakle kan saindang pag-iriba nadalagan sa Naga mantang yaon digdi an dakul na mga tawo na madaling makatipon nin limos. Sa maghapon nindang iribahan an familia, bitbit an omboy inaaabot nin P1,000 hasta P500 nin huli ta igwang nagtataong puon sa P500 hasta P1,000, iyan si mga mahihirakon na may kayang familia alagad bako man sa gabos na oras, sabi pa.


Pakatapos kan Pasko nabuelta sinda sa saindang estaran sa gilid kan dagat sakop kan Sitio Pinagpala, Pasacao, Camarines Sur.

Jilael Bobsoler Sawalani, lider kan Badiao pigpapaheling an mga perlas na hikaw asin alahas sa Bicol Mail na pinapabakal asin iyo an saiyang hanapbuhay kun nakikilimos an saiyang pag-iriba kaogmahan sana sa paghanap nin pamasko. (DPAureus)



Kadakle kan saindang hanapbuhay naglalako nin ano man na ‘‘accessories’’ kabale na digdi an perlas na hikaw.


An lider kan Badiao nagsabi pa na dai man siya kaibahan sa pakikilimos envez nagnenegosyo nin perlas sa presyong P250 hasta P300 asin ibang perlas nagcacantidad nin P1,500. Nagpapa-utang pa siya nin perlas asin hikaw sa mga paratukdo.


Afuera pa kaini, igwang sadiring baroto na may minsan inaarkilahan ni Alcalde Niño Tayco asin iba pang consejal.


Siya 20 anyos na sa Pasacao asin siya na an pinakahaloy sa grupo kaya siya an ginibong lider.


Maabot sa 23 na mga familia kan Badiao na nag-eestar sa gilid kan dagat asin sindang mga ama rehistradong votantes sa banwaan nin Pasacao.


Mientrastanto, si mga menor de edad na ginigibong paralimos kan magurang dinarakop kan City Social Welfare and Development Office na piglalaoman sa laoman nin mga aki sa Brgy. Pacol.


An dahilan kan CSWDO, delicado sa aksidente an mga aki na basang nalunad sa pampasajerong jeepney ngani sanang makilimos. Alagad pinapaapod an lider nganing ipuli sa Pasacao. (dpa)