Palarong Panlungsod pig-uktaba sa Feb. 25-26

Pinadagos kan Department of Education (DepEd) an preparasyon sa Palarong Bicol sa Abril 22 hasta 28, 2023, sa City School Division (SDO) kan Ciudad nin Naga pigtalaan kan Febrero 18 hasta 19 an Palalarong Panlungsod (City meet) alagad pig-uktaba sa Febrero 25, 26 huli sa apektado kan mga pag-uran.

Ini an desisyon kan SDO sa pamamayo ni City School Division Superintendent Manny De Guzman nganing saindang andaman an inaapod nang ‘‘Modified Palarong Bicol’’ para sa pigtalaan na regional selection meet sa Abril 24-28.

An DepEd nagseguro na an pagpadagos kan Palaro dapat maibitaran an suspension kan mga klase. Kan mga nakaaging Palaro apektado an mga klase huli kan mga suspension nin klase asin habo nang mangyari ini kan ahencia mantang igwa na nganing naenot na mga pagsuspendi nin klase huli kan halawig na mga pag-uran.

Kan Febrero 15, 2023 an DepEd central office nag-anuncio na ibubuelta na an Palarong Pambansa ngunian na taon.

Ngunian na taon an regional sports meet magpapadagos sa bagong format base sa DepEd Order No. 005 series of 2023 para sa gigibohon na Palarong Pambansa.

Ini matapos kan duwang taon mayong nangyaring Palaro huli kan pandemya asin liwat bubuhayon ngunian na taon.

Sa DepEd Bicol, pinahayag na ni Education Support Services Division Chief Engr. Ronald Asis na designado bilang Regional Sports Coordinator, nagpahayag na an Regional Management Committee para sa Palarong Bicol nagkaigwa na nin nagkaperang veces na miting para sa pag-andam kan mga manlaen-laen na events.

An Modified Palarong Bicol pig-intruducir ngunian na taon nganing maibitaran an mahibog na pagtitiripon, minus gastos asin maibitaran an mga suspension kan klase sa panahon nin mga karawat.

Kabali sa mga kakawaton iyo an football, futsal sepak takraw, baseball, softball, basketball, volleyball, athletics, gymnastics, archery, asin sa special events na swimming. (DPAureus)