Palay procurement kan NFACSur/CNorte Branch, iginilid

Pili, Camarines Sur --- Iginilid na ngona kan National Food Authority (NFA) sa Camarines Sur asin Camarines Norte Branch an saindang palay procurement program huli sa tambak na an saindang paroy sa mga bodega.

Igua nang total na 360,000 na stock nin bagas mantang 499,400 sa saindang mga bodega sa CamSur/CamNorte Branch.

Ini an mga pahayag sa Bicol Mail ni Julie Jarbeña, opisyal na parataram kan NFA CamSur/CamNorte na saro na sanang sanga kan ahencia poon na mag-epekto an Rice Tariffication Law (RTL) kan Febrero 2019 sa administrasyon ni dating Presidente Rodrigo Duterte.

Dati-dati maheheling an mga nakapilang truck na pano-pano nin ipapatongod na paroy hale sa mga paraoma huli ta mas halangkaw an presyo digdi kumpara sa pribadong mga kumprada. An presyo kan saindang bagong aning paroy nagcacantidad nin P17.00 mantang an alang P23.00 cada kilo alagad sa pribadong halangkaw na an P11.00 hasta Php12.00.

An pagparababa sa presyo kan paroy poon sana na mag-epekto an RTL na dating pagdreno sa senate bill iyo si dating Senador Cynthia Villar asin inaprubaran ni Duterte kan Febrero 2019.

Prohibido kan ley an pagsuplay ninda sa mercado kan baratong presyong kan NFA rice alagad natawan buelo an mga darakulang negosyante nin bagas mientras sinda na an nag-aangkat nin bagas nganing ipabakal an mahal na presyo sa mga mercado.

Dai man dinangod kan dating administrasyon an mga protesta kan sektor nin paraoma contra sa RTL. Pakatapos kan administrasyon Duterte dakul nang mga politico nagpapangako cada eleksyon na mapasar nin ley nganing tunawon an RTL alagad sagcod sa ngunian nakapako.

Sinda nagpapabakal nin NFA rice sa mga lokal na gobiernio saka iba pang ahencia kabale na kun iguang calamidad nganing gamiton isuplay sa mga evacuation center na apektado kan calamidad.

Sa ngunian poon kan Agosto 28, 2025 pig-iimplementar na kan ahencia digdi sa Camarines Sur an ‘’Benteng Bigas’’ o pagpabakal nin baratong presyo nin bagas sa cantidad na P20 na ginigibo sa NFA Pili, Camarines Sur alagad limitado sa diez kilos cada pagtungod kan consumedores.