Palay seeds pinanao sa 3rd district kan CS

Kasunod kan dakulang danyos sa mga kaomahan huli kan ‘‘shearline’’ asin LPS na nagresulta sa mga tubig baha, si Camarines Sur 3rd district Representative Gabriel H. Bordado Jr. tolos nagresponde sa nagkaperang mga banwaan kan distrito nganing matawan nin palay seeds si apektadong rice farmers nganing makataruk tolos sa saindang mga oma.

Sa damage report kan Department of Agriculture sa Bicol pigpahayag ni Lovella Guarin, opisyal na parataram kan ahencia na an Camarines Sur saro sa may mahiwas na kaomahan inabot nin baha si mga tinanum na paroy. Ini huli kan halawig na mga pag-uran poon kan Deciembre 18, 2022 hasta kan nagtalikod na bulan nin Enero 2023 na bitbit kan ‘‘shearline’’ asin LPS.

Nganing mamantenir an food security si Bordado sa paagi kan saiyang District Office sa Ciudad nin Naga na pinamamayohan ni Glenda Villaflores Dasco asin DA Regional Office sa pamamayo ni Regional Executive Director Rodel Tornilla nagtarabangan tanganing mahatudan nin sinakong palay seeds an lambang benipisyarong paraoma sa 24 barangay kan Canaman, Camarines Sur na kaipuhan an banhi matapos kan danyos sa saindang mga oma.

Sunod pang banwaan na pigbisita si mga paraoma na kaipuhan an banhi iyo an Bombon, Camarines Sur na katuwang ninda sa palay seeds distribution iyo si Alcalde Ma. Luisa DC Angeles asin MAO Jessica Arevalo nganing maparikas an distribusyon sa mga benipisyarong paraoma.

Naghahalat an DO nin dugang na suplay nin banhi hali sa DA nganing aboton man sa ibang mga paraoma sa tercer distrito kan provincial. (dpa)