PALIWANAG KAN DPWH: Bordado dai nakikiaram sa mga flood control project

Sa tahaw kan mga controvercia sa implementasyon kan flood control project, si DPWH District Engr. Romeo Doloiras kan 3rd Camarines Sur Engineering District naglinaw na ano man na pig-iimplementar na flood control project si dating Representante Gabriel H. Bordado Jr. dai nakikiaraman sa sinambit na proyekto sa saiyang congressional district.

Si Doloiras nag-atubang sa entrevista ninda Station Manager Ed Ventura asin Grace Inocentes na program host kan Doble Pasada kan DWNX nganing simbagon an mainit na isyu sa flood control project alagad malinaw na mayong nangyaring ‘‘ghost project’’ sa sakop na congressional district sa panahon ni dating Assistant Minority Leader Bordado na ngunian bise alcalde na kan Ciudad nin Naga.

Kun igua man barangay resolution na naghahagad nin proyekto sa infrastraktura iyan saindang pig-eendorso sa dating congresista nganing makabale na mafondohan alagad sinda man giraray sa DPWH na desisyon.

Si Bordado, nasa minority group kan Camara-Baja alagad igua man na-fondohan sa proyekto kan flood control na mga barangay sa Ciudad nin Naga asin iba pang municipalidades kan saiyang sakop na congressional district.

Si Doloiras kabale sa mga opisyales kan ahencia na nagsumiter na kan saiyang courtesy resignation kasunod kan kahurotan ni DPWH Secretary Vince Dizon na dapat magsumiter nin courtesy resignation an gabos na mga regional directors asin district engineers sa tahaw kan isyu sa mga flood control projects.

Siya harani na sa mandatory age nganing magretiro na sa serbisyo sa ahencia.