PALLGU kan LGU CamNorte dai na pigpadagos - NFA

Nanghihinayang an mga paraoma sa suporta kan Kapitolyo Provincial kan Camarines Norte matapos dai na ipadagos an subsidiya sa presyo kan paroy na binabakal sa sainda kan National Food Authority (NFA) sa pagtao nin fondo sa paagi kan Palay Marketing Assistance Program for Legislators and Local Government Units (PALLGU).

Si OIC Branch Manager Marbin Malabanan kan NFA Camarines Norte/Camarines Sur nagsabi na dai na pinadagos kan gobierno provincial kan Camarines Norte an ayuda sa palay procurement program na P5.00 cada kilo sa presyo kan ahencia na Php18 sa bagong ani asin Php24 sa malinig asin alang na paroy na pinapatongod ninda sa ahencia.

An PALLGU nagpoon kan Febrero 27, 2024 sa paagi kan Memorandum of Agreement entre kan LGU Camarines Norte asin NFA alagad sa ngunian hinale na huli ta nagdedepende sa fondo kan LGU.

An paghinayang kan mga paraoma huli kan bagsak na naman an presyo sa mga komprada na inaabot na sana nin Php12.00 cada kilo sa tahaw kan bulan nin aranihan alagad hababaon an presyo. Kun pinadagos an P12.00 magiging Php17.

Dati nag-aabot sa Php14 alagad binagsak kan mga kumprador sa sa doce pesos.

Kan Septiembre 20, 2023, an NFA nagpalangkaw na kan presyo sa P24 sa saindang palay procurement program (PPP) asin dugang na P5.00 alagad hinalian nang fondo kan LGU.

Huli ta dakul an nagpapabakal nin paroy sa NFA tambak naman an saindang stock sa mga bodega.

Sa programa kan Department of Agriculture na magbakal nin P20.00 sa mercado alagad an NFA CamSur/CamNorte nagsabi na preparado sinda mantang naghahalat sana kan direktiba hale sa opisina sentral kan DA.