Pambabadil sa 2 pulis kinundenar kan NCPO, familia kan suspechado

Nagmumundo an Naga City Police Office (NCPO) sa nangyaring pambabadil gadan kan duwa nindang kabado sa trabajo sa kamot kan sarong lulong sa droga asin dai palang nahahaloy nakaluwas sa National Bilibid Prisons.

Alagad saindang kinukondenar an madugong incidente kan basang na pagbabadilon an mga naka-duty opisyal kan NCPO na sinda P/Chief Msgt. Romeo Padua asin P/Cpl Christian del Valle, nagresponde tolos an kapupulisan kan ciudad na nagprubar pang maglaban an armadong suspechado na si Jerico Cano na dagos nang pinagbabadil kan awtoridad asin binawian nin buhay alagad sa suhay na entrevista an magurang ni Cano dai nagsurog envez kinukondenar an saiyang aki sa maka-ngirat na krimen sa duwang biktimang pulis.

Ini an mga pahayag ni P/SMS Tobias Bongon, opisyal na parataram kan NCPO na saindang pighihinayangan an mahigos sa trabajo komo mga awtoridad na pinagbabadil sana kan sarong dorogista.

An insidente nangyari kan Sabado, Oktubre 16 alas 6:30 nin banggui sa Kalye Dinaga mantang nagpapatrolya si Padua kan biglang pakulon nin tubo sa payo na dagos nang natumba asin kinua pa si service firearm sagcod na pinagbabadil gadan.

An Police Station 1 tulos nag-responde alagad mantang nagpapatrolya sa brgy. Tabuco asin nagpapadalagan kan saiyang motorsiklo si del Valle kan maheling kan suspechado pinagbabadil gadan.

Igwang mga testigo na namidmid an suspechado sagcod sa saiyang residencia inabutan kan mga nagreresponding kapupulisan yaon sa laog si Cano bitbit an inagawan niyang badil sa Sitio Espokoy, Sabang asin digdi na nag-encuentro sagcod na naenotan kan mga awtoridad, binawian man buhay an suspechado.

Si City Director P/Col. Marlon Catan nagpahayag sa saindang inbestigasyon an suspechado lulong sa droga asin mayo man naheheling na motivo nganing badilon an duwang biktimang opisyal kan PNP.

Sinabi pa na si Cano dai palang nahahaloy nakaluwas sa Muntinlupa asin ‘‘under probation’’ sa casong frustrated murder kan taon 2016.

Siya luwas laog sa carcel sa NCPO huli sa casong pang-hahabon asin sa ilegal na droga.

SUSPECHADO KINUNDENAR KAN SAIYANG MAGURANG

‘‘Mas marhay nang iyo ini an nangyari ki Jerico pinagbabadil na kan mga pulis huli ta dagdag sanang problema sa familia’’. Ini an pahayag ni Mrs. Melinda Cano, ina kan suspechado na nagpuli palang hale sa saiyang trabajo sa Manila alagad gadan na kan saiyang abutan sa residencia sa Sitio Espokoy.

Sinabi pa kan ina haloy na nindang sinasaway si Jerico na pumundo na sa paggamit droga alagad dai nagpapa-saway, mas marhay na ining nangyari saiya.

Maging an tugang ni Jerico, na si Jemily nagsabi man na ‘‘marhay nang gadan na an saiyang tugang huli ta dai nagpapasaway nakakadamay pa sinda.’’

Dai nagpapa-saway kan saiyang padagos na paggamit droga, ‘‘marhay na ining nangyari sa saiya’’.

An suspechado para-padyak an hanap buhay asin binayaan kan saiyang esposa kaibahan an duwang sadit na aki nganing nagpuli sa saiyang magurang, sabi pa. (dpa)