Panahon Na, Oras Na

May sinabi si Socrates Villegas, Arsobispo kan Lingayen-Dagupan, na nabasa ko sa Facebook na dapat seryosong pag-isipan kan mga Katoliko ngunian na mga panahon. An sinabi ni Arsobispo Villegas sa English iyo ini, “If you don’t know how to get angry at the corruption, at the money that should be given to the poor but goes to the pocket of powerful people, then something is wrong with your Christianity.”

Sa opinyon ko, garo gulping Katoliko an tinamaan kan sinabi ni Arsobispo Villegas. An iba nganing mga Katoliko pig-jujustify pa an salang ginigibo kan mga poderosong mga tawo, na halos an kadaklan mga politiko, lalo na kun sinda naaambonan man. An iba naman dai na lang nag-gigirong ta habo nang makiaram; sasabihon ninda mayo man nangyayari.

Dai ko binabasol an mga Katolikong nawaran na nin kumpyansa asin pagtubod sa gobyerno o sa mga poderosong politiko. Pero may mga Katoliko man na sineseryoso an saindang pagka-katoliko na, maski sa sadit na paagi, nakikipaglaban nganing magka-igwa nin tunay na pagbabago sa gobyerno. Ini an mga Katolikong an adbokasiya mawara an korapsyon sa gobyerno asin ipaglaban na magka-igwa nin hustisya sa Pilipinas lalo na an mga kapobrihan o an mga nasa inaapud na nasa laylayan.

Kan nabasa ko an sinabi ni Arsobispo Villegas, bigla kong naisip an nangyayari sa Kongreso kun sain pig-iimbistigaran kan Quad Committee si Bise Presidente Sara Duterte.

Sa halipot na eksplikasyon, pig-iimbistigaran si VP Sara kan Kongreso kun pano nya ginastos an P125M na confidential funds sa laog nin onseng aldaw kan 2022. Dagdag pa igdi, pig-iimbistigaran pa si VP Sara kun pano nya ginastos kan nakaaging 2023 an P500M na confidential funds kan Opisina kan Bise Presidente (OVP) saka an P150M na confidential funds kan DepEd.

Sagkud ngunian mayo pa bagang desisyon an Kongreso sa pag-imbistigar ki VP Sara. Pero base sa mga nagruluwas nang mga impormasyon sa imbistigasyon kan Kongreso, malinaw para sakuya na iniibitaran ni VP Sara na i-eksplikar sa Kongreso kun pano nya ginastos an confidential funds kan saiyang opisina.

Gulpi pa nganing palusot si VP Sara. Perang beses na syang dai nag-atendir sa hearing o pagdangog sa Kongreso. Minsan mayong supog nyang pinapa-resign an sarong chairwoman kan sarong komite ta dai nya nagustohan an sinabi.

May mga resibo man kutang sinumite an OVP sa Commission on Audit (COA) kaso pirmado nin mga pekeng tawo arog ni “Mary Grace Piattos.” May mga staff kan DepEd na pig-bribe o nakarecibe nin mga enbelop hali sa OVP na may laog na kwarta.

May mga nadiskubre pa an COA na may inarkilan an OVP nin sarong safe house na an kantidad P1M sa laog lang nin apat na banggi.

Sa sakuyang pag-analisar, habo talaga ni VP Sara na magin accountable kun pano nya ginastos an kwarta kan gobyerno. Kamo na an maghusga kun sain napaduman an kadaklan kan confidential funds ni VP Sara. Kaya natural isipon kan mga tawong arog ko na grabe an korapsyon sa opisina kan OVP.

Balik kita sa sinabi ni Arsobispo Villegas na dapat maanggot an mga Katoliko sa poderosong tawo arog ni VP Sara na habong magtao nin tama asin totoong eksplinasyon kun pano nya ginastos an ribo-ribong confidential funds na pag-sadiri kan gabos na mga Pilipino.

Pero garo baga mayong takot si VP Sara kun umasta. Kun sa Bikol, garo pa orag-oragon. An hiling nya sa sadiri nya “above the law.” Tinakot pa ngani si Presidente Bongbong Marcos, an First Lady saka si Speaker Martin Romualdez na may nakaolay na daa syang tawo na magadan sainda sa oras na may mangyari saiya.

Kun ordinaryong tawo si VP Sara siguro dinakop na sya arog kan nangyari ki Ronnel Mas, sarong maestro na nag-tweet na matao syang P50M sa tawong magadan ki Presidente Digong Duterte. Kinasuhan baga tulos an maestro nin sedisyon asin dai pagsunod sa Republic Act No. 6731 (Code of Conduct and Ethical Standards for Public Officials and Employees).

Ano ta dai makasuhan si VP Sara nin sedisyon?

Ngunian na may nag-file na nin impeachment complaint ki VP Sara dakulang tunok an mawawara sa pagkabuhay kan mga tawo kun ma-convict sya sa Senado.

Dai ako tubod sa sinabi ni Presidente Bongbong Marcos na sayang lang an oras asin mayong maitataong marhay sa buhay kan mga Pilipino kun i-iimpeach si VP Sara. An milyones na kwartang nawawara sa opisina kan OVP kwarta kan mga Pilipino. Dapat ibalik ini sa mga Pilipino asin gastoson sa mga programang makakatabang sa mga tawo.

An gusto kong sabihon, dakulang benepisyo para sa mga tawo kun ma-convict si VP Sara ta mawawara sa gobyerno an sarong opisyal na habong magin accountable kun pano nya ginastos an kwarta kan gobyerno, an kwarta kan mga tawo.

Sa opinyon ko, saro si VP Sara sa inaapud ni Arsobispo Villegas na poderosong tawo na dapat kaanggotan kan mga Katolikong seryoso sa saindang pagka-Kristiano.