Pandemya tagulnod sa wage increase sa Bicol

Naka-andam ipasunod kan Regional Tripartite Wages and Productivity Board (RTWPB) an bagong wage order ano man na bulan ngunian na taon o maging sa 2022 oras na magkulpa na an problema sa corona virus disease.


Naka-ulang an pandemya kan magpuon an krisis sa salud kan Marso 2020 mantang nasa proceso kan pag-isyu an RTWPB Bicol sa ipapaluwas na Wage Order No. 20 para sa viente cinco (Php25.00) pesos na daily wage increase sa pribadong sektor.


Ini an mga pahayag kan RTWPB sa kaaldawan kan Labor Day (Mayo uno) sa paagi ni spokesperson Francia Ocmer sa tahaw kan mga kahapotan kan obreros sa pribadong sektor kun ano nangyari kan pandienteng Wage Order No. 20.


Naka-agenda sa miting kan commission na pigtalaan kan Marso 12, 2020 alagad inabot nin krisis sa coronavirus disease asin dagos nang kinancelar kan junta, sabi pa ni Ocmer.


Base sa saindang guidelines an junta puedeng magdangog sa petisyon sa wage increase kan obreros, alagad kun mayong petisyon sa paagi kan saindang iniciativo o mutio propio sinda an mag-adal asin maproceso para sa dugang na sueldo sa pribadong sektor.


An propuestong Wage Order No. 20 base sa iniciativo na kan RTWPB Bicol alagad na-uulang huli kan pandemya.


Dakul na mga establisimiento an temporaryong nagsara huli ta apektado kan economia asin kabale man digdi an rinibong nawaran nin trabajo, kaya dificil pang mag-implementar huli sa lakma pang economia.


Sa ngunian cantidad sanang Php310 an minimum na daily wage kun nadagos an dugang na sueldong Php25.00 dakulang bagay sa mga obrero.


Kan nakaaging selebrasyon kan mga obreros kan Labor Day mayong mga mahiwas na hiro protesta nganing maghagad nin dugang na sueldo envez hinahapot an Wage Board kun ano na si nangyari sa Wage Order No. 20.


An estrictong pag-implementar kan social distancing o health protocols iyo an nakapugol sa mga hiro protesta.


An Duterte administration mayo man nin ‘‘good news’’ sa obreros kan pribadong sektor. (DPA)