Pandemya tutokan bakong Cha-cha- Bordado

An congresista kan tercer distrito kan Camarines Sur saro man sa mga lehislador na nagcocontra sa propuestong charter change nin huli ta bakong napapanahon envez an dapat tawan nin prioridad iyo an vaccination program.

Si diputado Gabby Bordado Jr. nagpahayag nag-aatubang an nasyon sa krisis sa salud mantang yaon pa an pandemya dai niya naheheling na dapat tawan nin prioridad kan congreso an pag-enmienda kan 1987 constitution.

An Committee on Constitutional Amendments na pinamamayohan ni AKB Party List Representative Alfredo Garbin Jr. nagpapadagos na kan saindang committee hearing alagad sinabi kaini na nakatutok sana sinda sa pagretoki kan konstitusyon an pag-enmienda kan economic provision.

Alagad piglinaw ni Bordado na dai man siya totalmenteng nagcocontra sa cha-cha mantang an kaipuhan tawan nin atensyon ngunian kan administrasyon iyo an problema sa coronavirus disease mala ngani igwa nang caso kan bagong United Kingdom (UK) variant kan Covid-19.

Dai siya nagpapabor sa pigtutulod sa congreso na magkaigwa nin constituent assembly (Con-AS) mantang dai mahahalian nin mga pagduda an namamanuaan Filipino na posibleng paborable naman sa mga nakatukaw sa puesto an pag-enmienda siring kan isyu sa term extension.

Mas pigtutulod niya na dapat an voces man giraray kan namamanuaan Filipino an magdesisyon sa paagi kan pagpa-apod nin constitutional convention.

Sa isyu sa reforma kan party list yaon na diyan an Acta Republica 7941 o mas midmid sa Party List System Act, ipaubaya na sa Commission on Election (Comelec) kun igwang cuestion sa party list puedeng magsangat nin disqualification case, sabi pa ni Bordado.

An bagong bilogon na Back to Service in Congress (BTS) ni dating Speaker Alan Peter Cayetano an nagpahayag kan saindang panindugan contra sa cha-cha envez an kinakaipuhan tutukan kan gobierno an pandemya siring kan controvercia sa bakuna laban sa Covid-19. (DPAureus)