PANDOK PIRAK

Tigsik ko an tambay na huslaon

Pasadpasad na, aga hasta hapon

Kusog kan pagmate saka pamarong

An hanaphanap, libreng inomon!

Tigsik ko an graft and corruption

Gikan sa palad na guminatol

Nagrakrak nagin cancer kan nacion

Dae na maampat, mayo nang bolong!

Tigsik ko an magulang na kabalang

Kan ibinaba na sa kapatagan

Paghilingon, nagin kagalanggalang

Pigkakakan, batag man giraray!

Tigsik ko an politicong pa-epal

Nakaw- eksena sa tiriponan

Sa pa-pogi, siya an  number one

Sa proyekto, siya Number One!

Tigsik ko an buayang suwapang

Dakol an milagrong naginibohan

Sa plaza, siya pigcoronahan

Nanagin santong dakol an nag-aarang!

Tigsik ko ining pandok pirak

Grabeng pagkasablok sa samagrak

Kinakabig kwartang sangkatutak

Sa Diablo, ipibakal an kalag!