Pang gobiernong hotel sa Partido district bukas na sa turista
Ni Sonny Malate
Ngonian na peak season kan turismo sa mga tourist destination, dakulaon na ventaje an pagkakaigua nin mga hotel na puwedeng mapagpilian kan mga turista sa saindang pagtenir sa lugar na pigdumanan ninda.
Sa Caramoan, Camarines Sur, apwera sa mga privadong hotel na nagburutwaan huli sa dagmang na mga local o dayuhan na turista digdi, an PSU Caramoan Hostel na pagsasadiri asin pigmamanejar kan gobyerno sa paagi kan Partido State University Caramoan campus, sa pamamayo ni Dr. Michael A. Clores, nagin dagdag na facilidad na nagseserbi sa mga bisita an banwaan na ini.
An PSU Caramoan Hostel pigconstruir kan 2014 asin nagpoon magserbi sa publico kan 2021. Ini namumugtak sa mismong campus kan universidad sa barangay Cadong, banwaan na ini.
Segun ki Ms. Mary Michaela Anjoneth A. Tatualla, MBA, hostel manager, an room rate kan hostel mas hababa kaysa sa kadaklan kan mga hotel sa Caramoan.
Ini ipinatugdok bilang pagcomple sa kasugoan kan Commission on Higher Education (CHED) na maglaag nin hotel na pwedeng magin training facility para sa mga estudyantes sa cursong Bachelor of Science in Hospitality Management (BSHM). Siring man, ini parte kan economic enterprise venture kan escuelahan.
PSU Caramona hostel sa laog kan campus kan universidad.
An hostel may tolong escalon, iguang siyam na aircon rooms, wi-fi connection asin security guard, 24/7. Igua man ini nin mahiwas na parking area asin may banca na magagamit sa pag-island hopping, sa pakikipag-coordinar kan hostel management sa mga local na bangkero.
Dagdag pa ni Tatualla, an hostel may cafeteria asin pre-arranged meal service para sa conveniencia kan saindang mga cliente na naggigikan pa bako sanang sa Bicol kundi ibang parte kan nacion asin kinaban.
Manonotaran na an turismo orug pang nagigin mabaskog huli sa promotion kan mga tourist destination sa paagi kan social media.
An Caramoan dinadayo kan mga turista huli sa magagayon asin pambihira kaining mga baybayon, kadagatan asin isla na kinakawilihan kan mga bisita digdi. Huli kaini, buhay na buhay an turismo asin dakulang burabod nin revenue kan local government unit digdi.
Mientrastanto, apwera sa PSU Caramoan Campus, an PSU sa San Jose asin Sagñay, igua man nin sadiring hostel na nagseserbing training facility kan estudiantes sa BSHM digdi asin economic enterprise venture kan escuelahan.