Pangako sa pagtapos kan BIA posibleng makapako
Duda an Office of the Presidential Adviser for Bicol Affairs (OPABA) sa liwat naman na pangako kan Department of Transportation (DOTr) na tataposon kan saindang kontratista an P4.8 bilyon na Bicol International Airport (BIA) sa Septiembre 2021.
Pinagirumdum ni Undersecretary Marvel Clavecilla an DOTr na kun matao nin time line seguradohon na marerealisar envez kan maghanap naman nin ibang dahilan, matalaan giraray nin bulan asin taon.
Sinabi ni Clavecilla sa entrevista kan Bicol Mail na si enot na asegurasyon kan DOTr tataposon an multi-billion pesos na proyecto kan Hulyo 2020.
Php 4.8 bilyon na Bicol International Airport sa Daraga, Albay pigpapangako naman kan DOTr na matatapos na sa Septiembre 2021. (www.dbm.gov.ph)
Sa press release ni Transportation Assistant Secretary Goddes Hope Libiran kan nagtalikod na taon an BIA magiging operational sa enot na cuarto kan 2021, alagad sagcod sa ngunian puros pangako.
Saiya pang sinabi na an target completion kan Deciembre 2020, an nag-iimplementar kan proyecto iyo an Cuerpo Construction.
An patrabajo kinababalehan kan konstruksyon kan landside facilities, edificio kan terminal para sa pasajeros, extension kan runway, taxiway, asin drainage kabale na an iba pang site development.
Sa miting kan Regional Development Council saro sa natukaran an abalang pagtapos kan BIA na namumugtak sa Barangay Alobo, Daraga, Albay.
Pig-osipon pa ni Usec Clavecilla na saiyang sinabihan an DOTr bilang iyo an agencia na envuelto sa bilyones peso na proyecto dapat magtaong definite na bulan asin taon kun nuarin matatapos bakong permi nalang pigbabago an saindang target time line.
Si Alcalde Noel Rosal kan Ciudad nin Legazpi, Chairman kan RDC Bicol sinabihan an enhinyero kan kontratista na anggot na si Usec Clavecilla ‘‘gibohon na nindo an dapat na gibohon bako lang si Usec maging an Bicol atrasado nang marhay an proyecto.”
Tada nang raya an OPABA sa Cuerpo Construction na iyo an nakacontrata kan mga dakulang edificio kan Bicol Medical Center, alagad biktima an taga Camarines Sur kan abalang pagtapos kan bilyones peso na bagong edificio kan hospital.
Kan 1996, ginibo an pre-feasibility study kan BIA asin an notice to proceed pig-isyu kan 2003 kan panahon ni dating Presidente Gloria Macapagal-Arroyo. An konstruksyon nagsikad kan taon 2008.
Inabot sa bagong administrasyon ni dating Presidente Benigno Aquino III hasta sa naglaog sa administrasyon ni Presidente Duterte kan 2016 asin kabale sa prioridad sa Build-Build-Build project.
An Chairman kan RDC nagpahayag na oras na maging operational an BIA makakatabangan nganing makabawi sa paglakma kan economia sa rehiyon huli kan pandemya. (DPAureus)