PANGAPODAN SA SENADO: Cha-cha hinuhurot kan BAYAN, ibasura

Hinuhurot kan Bagong Alyansang Makabayan (BAYAN) sa Bicol na ibasura an Charter change (Cha-cha) asin dai magpagamit sa pairarum na plano ni Presidente Ferdinand Marcos Jr. asin sa mga congresista na habo nang maghali sa puesto.

Lusot na sa Camara-Baja an pigtutulod na Cha-cha asin yaon an bola sa senado kan saindang magiging desisyon nganing makaabot sa Malacañan.

Sa 18 mga Bicolanong lehislador unikong nagkontra sinda Representante Gabriel Bordado Jr. kan tercer distrito kan Camarines asin Representante Edcel Lagman kan premirong distrito sa Albay. Nanindugan an duwa na dai pa napapanahon an pag-enmienda kan 1987 constitution sa tahaw kan inaatubang na krisis sa economia ngunian kan nasyon na hali palang sa duwang taon na pandemya.

Afuera pa kaini, yaon pa an inflation na inaatubang kan mga Filipino asin dagdag pa an padagos na paglangkaw kan presyo nin petrolyo.

Dapat mamuklat na an senado envez isipon an futuro kan Filipino bakong ambisyon sa term extension. Dai sinda tiwala na an economic provision sana an papakiaraman sa 1987 constitution alagad iba pang probisyon pabor sa politico.

Sinabi kan BAYAN na pagabat sana sa namamanuan Filipino sagcod na mangyari pabor sa mga politico an term extension asin pagbenta kan satong economia sa dayuhan capitalista. Dapat magkasararo an namamanuan Pinoy nganing iprotesta an maitum na balak kan mga poderosong politico sa nasyon.

Dai sinda nagtutubod na dai aram ni Marcos Jr. an mga hiro kan saiyang mga kaalyado sa Camara na nagtutulod kan Cha-Cha.

Nagpapasan na ngani nin P13.7 trilyon na utang an nasyon malustay sana an gobierno nin bilyon-bilyon pesos nganing sanang marealisar an Cha-cha.

Nagtutubod pa na dapat resolberan nguna kan gobierno an grabeng kurapsyon envez na maglustay nin bilyones pesos para sa Cha-cha. (dpa)