Panggagadan sa daragita, kinundenar

Pinangenotan kan Bangon Kababaihan (BK), simbahan, paratukdo, jovenes, estudiantes asin iba pang organisasyon sa Barangay Mambulo Nuevo, Libmanan, Camarines Sur an paglakaw bilang protesta asin pagkundenar sa paagi kan ‘‘Lakaw asin Pagpamibi Kontra Karahasan’’ na piglansar kan Domingo, Enero 8, 2023 para ‘‘Justice for Juliann Berzuela’’ na nawarara kan Deciembre 25 alagad nakua nang gadan kan Deciembre 28, 2022 na aga.

An biktima nakua sa gilid kan sapa agang amay na mayo nang buhay sa Sitio Purikot, kan Brgy. Mambulo Nuevo na positivo man na pigmidbid kan magurang. Sa inicial na inbestigasyon kan Libmanan Municipal Police Station may tama nin nagkaperang veces nin pukpok asin natipo pa si tolong ngipon.

‘‘Lakaw asin Pagpamimi Kontra sa Karahasan’’. An manlaen-laen na grupo sa pangenotan kan kaibaihan, simbahan, paratukdo asin iba pang organisasyon naglalakaw sa tinampo kan Brgy. Mambulo Nuevo, Libmanan, Camarines Sur nganing kundenaron an makangirat na pangga-gadan sa dose anyos na daragitang si Juliann Berzuela. (Retrato kua ni Ernie Marfil)

Nagpapadagos pa an inbestigasyon kan MPS mantang saindang hinahalat an autopsy report kan SOCO sa Camarines Sur Police Provincial Office.

Dakul an mga nagparticipar sa protesta sa pangenot kan grupo kan BK sarong NGO, parukya kan Mambulo Nuevo Parish Church asin iba pang grupo na naglakaw alas 8:00 nin aga pakatapos kan misa sundo sa junction kan Sitio Purikot sa kaparehong barangay na kun saen digdi nakua an bangkay kan biktima.

Sa protesta kinukundenar kan manlaen-laen na organisasyon an makangirat na krimen asin an saindang kurahaw hustisya sa biktimang doce anyos na daragita.

Activo man sa paghagad nin hustisya iyo si Consejal Edelson Marfil kan Sangguniang Bayan sagcod sa pangapudan sa MPS na maparikas an inbestigasyon sa caso.

An saiyang ginibo nagtaya na nin P30,000 reward money nganing makatabang na maresolberan tolos an caso mantang nagkapera nang casong panlulupig digdi an nangyari alagad an pinakahuring insidente makangirat na si krimen huli ta ginadan pa si biktima, sabi pa kan consejal.

Namumundo an Ina kan biktima na si Josephine, huli ta an saindang daragita igwa pang ambisyon sa buhay. Saiya pang sinabi na dapat dai paturogon an responsabli sa krimen.

Sa lado ni Punong Barangay Arnel Agapor, tolong caso na nin panlulupig an nangyari sa saindang barangay asin an saro sa saindang aksyon iyo an estrictong iimplementar na an curfew ordinance.