Paniki sa Diklom Kan Plaza

Kung ang mga plaza sa New York, Sa Paris, asin sa Manila, namumulaag sa grabeng Liwanag kan mga bombilya kaya magayon na pasyaran ang mga Plaza lalo na kung bangui. Alagad naiiba ang Plaza Rizal kaidtong mga inot na aldao na mas bantog ini sa apod na lugar nin mga makuapo ni Rizal. Ang boot sabihon kan makuapo ni rizal iyo ang mga kababaihan na nagpapa arkila nin buhay na laman sa kantidad sanang sanggatos ang kada payo. Dai maisihan kung tinutuyo kan City Hall kaidto na marumarom ang laog kan Plaza Rizal o baka nagtitipid sana sa koryente tanganing kadikit ang bayaran sa Bicol Electric na dai naghaloy naging Casureco II. Sa mga sine o pelikula nahihiling ang mga Plaza duman sa America, sa Yuropa asin sa Luneta na kadakol nin poste nin ilaw kaya tunay na maliwanag asin dai makatakot na mag istambay. Kung ako yaon sa Manila, naoogma kaming magpasyar sa Luneta dahil tunay na magayon asin maliwanag. Sa Luneta iguang dakulaon na mapa kan pilipinas, iguang mga nag babayle habang nag papadarosdos nin skates, iguang makusog asin magayon na sounds kaya an mga familya nakaturukaw sa lawn asin nag oorogma bakong arog kan Plaza Rizal kan kita mga aki pa na pinag babawal kan mga magurang sa mga aking daragita na mag agi sa laog kan Plaza Rizal ta baka siya mamaluan na makuapo ni Rizal. Ang mga makuapo ni Rizal, naka turukaw sa poon nin kahoy na madiklom asin solamente anino sana ninda ang saindong mababanaagan, asin ang iba sainda mayong pinag iba sa Paniki ta naka sarabit sinda sa sanga kan kahoy asin nagkukurulambitay na huna mo mga kulapnit. An siisay man na lalaki na makarni sa poon nin kahoy tolos ining pig rarapado nin latigong halaba tanganing magsabod sa saiyang leog asin duman siya bubutongon na huna mo nakasubad na banwi, butong parani sa diklom nin kahoy. Kung yaon na sa diklom sasabihan siya kan mga makuapo ni Rizal kung ano ang gusto niya? Kung gusto niya nin buhay na laman sa kantidad sanang sanggatos, o kung mayo siyang dakulang budget, maski saro na sanang balut, asin patos nin salted na mani total ang itatao man saiyang buhay na laman iyo idtong laman nin 60 anyos na makuapo ni Rizal na ang hitsura mayong pinag iba sa masiri asin maribok na Lola na ang buhok huna mo esperitista. Kan magka igua na nin pagbabago sa gobyerno kan kapitolyo, ipinag bawal ni Gobernador ang mga makuapo ni Rizal, pina kusog an mga ilaw, asin pinalayas ang mga sadiring tawo ni Rizal kung kaya ang mga familya asin mga kaakian naging maogma sa pag pasyar sa Plaza Rizal ta iguang dakulang telebisyon asin igua pang nagtutugtog nin violin. An dai sana nawara iyo ang mga para debate sa relihyon asin mga para mani, mayo pa kaidto nin bulastog asin babecue, alagad ang masulong kaidto sa Plaza iyo an tinda ni Kalamay.