‘Para sa bayan ngona,’ sabi kan sarong bagong doctor

Iginilid ngona kan saro sa 58 mga nagtapos na estudiante kan Bicol University (BU) sa Ciudad nin Legazpi na nakapasar sa Physician Licensure Examination (PLE), an ambisyon na magtrabajo sa abroad envez magserbe sa kapwa Filipino.

Ini an mga pahayag ni Dr. Maria Francesca ‘‘Cheska’’ Q. Lavadia-Gumabao, aki ninda dating Liga ng mga Barangay President, Consejal Julian Lavadia Jr. asin dating Consejal Babeth Lavadia kan Ciudad nin Naga kan makunduciran nin entrevista kan Bicol Mail. Sinabi kaini ‘‘Mas kaipuhan magserbe sa kapwa Filipino o para sa bayan ngona’’.

Sa reaksyon man kan saiyang ama ‘‘Sadiri niya yan conviction’’.

Sa ngunian nagkukulang an mga doctor sa nasyon maging kan nurses sa mga hospital orog na digdi sa Bicol siring kan Bicol Medical Center (BMC) mala ngani an saiyang plano na magtrabajo sa BMC.

Sa ngunian sa datus kan Department of Health (DOH) nagkukulang an mga doctor asin nurses sa nasyon mantang prioridad na ninda magtrabajo sa abroad huli ta sobra pa sa triple an sueldo.

Saiya pang pig-osipon nasa elementarya pa sana an saiyang ambisyon maging abogado asin doctor alagad sa saiyang pinal na desisyon kaipuhan maging doctor na iyo an kaipuhan sa ngunian. ‘‘Sadiri ko nin desisyon dai na nakiaraman si Papa asin Mama’’

Si Dr. Cheska Gumabao iyo an ika-duwang doctor kan familia Lavadia, mantang an enot si Dr. Julian Naismith Q. Lavadia.

Sa 74 nag-examin hali sa Bicol University 58 an mga nakapasar sa Physician Licensure Examination kan Oktubre 2022 na ginibo sa manlaen-laen na mga ciudad na kinababalihan kan Manila, Baguio, Cagayan de Oro, Cebu, Davao Iloilo, Koronadal, Legazpi, Lucena, Pampanga, Rosales, Tacloban, Tuguegarao asin Zamboanga.

Siya nagtapos nin elementarya sa Hope Christian High School, sa segundarya sa Naga City Science High School asin sa colegio sa University of Santo Tomas (UST) sagcod na nagtapos kan saiyang ambisyon sa BU, Ciudad nin Legazpi. (dpa)