Para sa mabaskog na ekonomiya: Local Economy and Investment Promotions Office bibilogon

Importante sa panahon ngonian an pagbangon kan ekonomiya asin mga negosyo, lalo na ngonian na nag-aantisipar na an gabos sa post pandemic situations sa bilog na nasyon tangaring makabawi orog na sa aspeto nin pagbuhay.

Ini an sinabi ni Mayor Nelson Legacion pagkatapos na ipahayag an plano kan LGU Naga na maghaman nin bagong opisina na iyo an maasikaso sa pagpapagantad asin pagpabaskog kan negosyo asin ekonomiya sa laog kan syudad nin Naga.

An Local Economy and Investment Promotions Office iyo an makusog na makakatuwang kan Naga City Investment Board.

Segun ki Mayor Legacion, nakapagpoon na kaya an syudad nin Naga nin mga bagong growth areas na kun saen piglalaoman mas dakul na mga bagong investments an malaog sa syudad.