PARA SA RUTANG NAGA-LEGAZPI: PNR naghahalat dugangna makina hale sa Manila

An manijamiento kan Philippine National Railways (PNR) sa Bicol naghahalat nalang dugang na makina hale sa Manila nganing madungangan an viaje kan commuter train sa rutang Naga-Legazpi.

Kun minsan mayong viaje an kaparejong ruta huli kan defecto sa makina alagad kun igua nang bagong mag-abot ciertong madudugangan an viaje.

Ini an paliwanag kan manijamiento sa paagi kan opisyal kan PNR sa Ciudad nin Naga sa paagi ni Greg Mano. Sa ngunian an ruta kan Naga-Legazpi nahaling alas 5:30 nin hapon, Naga-Sipocot – alas 3:30 nin hapon mantang an Sipocot-Naga alas 12:10 nin hapon asin alas 5:35 nin hapon asin an Calamba-Lucena , alas 5:45 nin hapon.

Afuera pa kaini, igua pang viaje an rutang Naga-Iriga asin Baao-Iriga. Sa Sept 20-21 pwede maglunad an mga pasahero sa tren na viajing Naga-Iriga alas 10:00 nin aga mantang an sunod na viaje Iriga pasiring Naga alas 11:15 nin aga.

An dugang na mga viaje nganing matabangan an mga turista asin debotos kan imahen ni Ina na makalunad sa commuter train na mapasiring sa Ciudad nin Naga sa Kapiyestahan ni Nuestra Señora de Peñafrancia.

Magpapadagos man giraray an regular na viaje kan PNR sa rutang Lucena-Calamba, Naga-Sipocot, asin Naga-Legazpi.

Padagos nang nagdadakul an saindang pasajeros mantang barato an flete kumpara sa mga pampasajerong van asin jeep.