PARA SA VULNERABLE SECTOR: Early voting hours liwat ipapasunod sa eleksyon

Liwat ipapasunod kan Commission on Elections (Comelec) an early voting hours policy sa mga miembros kan vulnerable sector sa maabot na pirilian lokal asin nasyonal alagad bako nang piling ciudad asin municipalidad envez nationwide.

Ini an kinumfirmar ni Abogado Maico Julia Jr, Election Officer kan Ciudad nin Naga sa tahaw kan mga kahapotan kan senior citizens kun liwat mangyayari an early voting hours.

Saiyang sinabi an vulnerable sector kinababalehan kan senior citizens, persons with disability (PWDs), asin mga bados na masikad poon alas 5:00 hasta alas 7:00 nin aga alagad nagpatanid sa mga watchers nin mga candidato na dapat mag-abot sa voting precinct sa pigtalaan na oras mantang pag-exactong alas cinco nin aga dapat magpoon tolos an borotohan. Kun mawot magboto pasado alas siete nin aga tutugotan man giraray.

An desisyon kan Comelec central office huli ta naging epektibo si ginibong pilot testing sa ginibong pirilian kan Oktubre 2023 Barangay and Sangguniang Kabataan elections.

Magiging paborable sa sinambit na sektor an early voting hours sa saindang pagboto nganing dai na makisuksokan sa pagdagsa kan ginatos na botantes sa voting centers. Presko pa an panahon mantang kulang pa an nag-aarabotan na tawo sa mga polling precincts na nangyari ini sa ginibong pilot testing sa BSKE, sabi pa kan Comelec kan Ciudad nin Naga.

Sa pinakahuring listahan kan Comelec Naga para sa midterm elections an ciudad igua nang labi sa 121 rehistradong botantes.