Paraoma pinapakusog an bootipabakal an saindang paroy sa NFA

Tanganing dai malugi an paraoma sa pagpabakal nin paroy sa mga kumprada na baratong magbakal nin presyo, an National Food Authority (NFA) Bicol pinapakusog an boot kan paraoma na sainda na dapat magpabakal huli ta an saindang presyo P17 cada kilo sa bagong ani asin P23 cada kilo sa malinig asin alang nang paroy.

Sa ngunian agrangay an paraoma huli ta inaabot na sana nin P9 hasta P10 sa pribadong kumprada na apektado sinda sa siring na presyo envez na mag-ganansya asin bakabawi sa gastos kalugihan an saindang inaabot.

Igua nang pinaluwas na Executive Order 100 kan Oktubre 2025 si Presidente Ferdinand Marcos Jr. na nag-eestabliser nin floor rice sa paroy nganing matabangan an mga paraoma alagad dai man na-iimplementar.

An ibang paraoma disganado na envez nagbalyo na sa pagtanum nin natong na dikit pa sa gastos asin madali pa an ganansiya, alagad an NFA nagsabi na dawa arog kaini an reclamo kan ibang paraoma dakul paman giraray an nagpapabakal paroy sa sainda.

Igua nang mga paraoma sa Ciudad nin Naga, Rinconada area, provincia nin Albay, Daet, Camarines Norte asin iba pang mga lugar.

Pigkumfirmar kan Department of Agriculture an Deloverges Agri Farm sa Barangay Panoypoyan, Bula, Camarines Sur na nagdadakul nang ibang grupo nin paraoma an nagkukumbertir sa pagtanum nin natong sa saindang omahan.

Sinabi ni Rey Deloverges sa paagi nin pagtanum natong nagkakaigwa an saiyang agri farm nin de calidad na natong asin perang taon na sinda nagsusuplay sa ibang nasyon sa tabang kan mga exports traders.