ParSU mawot an pagparambong kan cultura sa Partido area

Ni Sonny Malate

GOA, Camarines Sur --- Pigmamawot kan Culture and Arts Unit kan Partido State University  (ParSu) Main Campus sa banwaan na ini an pagparambong kan cultura sa bilog na distrito kan Partido Area.

Segun ki John Vincent M. Baylon, Director kan Culture and Arts Unit, an ParSU magibo nin mga esfuerzos asin actividades na maresulta sa  pagpatalubo kan cultura asin turismo kan Partido Area sa pakikipagtabangan kan mga local government unit kan sampolong  banwaan digdi.  

Nasa irarom kan Culture and Arts Unit iyo an Kwerdas de Isarog ParSU Rondalla, Teatro Isarog, Literary Society, Cimarron, Octaves asin ParSU Drum and Majorettes.

An mga grupong ini  invuelto sa iba-ibang arte arog kan musica, sayaw, literatura, teatro asin iba pa na nagpapabaskog sa passion kan mga estudiante sa personal nindang talento. 

Pinakahuring nabilog iyo an Talingkas Film Society na nasa pamamahala  ni Romeno S. Cano, bilang adviser. Sa masunod na mga bulan an bibilogon  man  iyo an grupo nin mga visual artist.

Dae pa sana nahahaloy, an Talingkas Film Society  nagin miembro kan Academic Film Society na nasa irarom kan Film Development Council of the Philippines. Piglalaoman na ini madarang dakulang oportunidad na orug na mapauswag an grupo asin an talento kan mga kabale digdi. Sa pagigin miembro digdi, iguang mga asistencia na marerecebi an film group kan unibersidad.

An pagigin miembro sa Academic Film Society nagtao  man nin inspiration sa Talingkas Film Society tanganing magparticipar sa mga paaboton na pangnacion na filmmaking competition tanganing magkaiguang mas mahiwas na exposure sa dakula asin prestigiosong filmmaking contest an mga estudiante.

Miembros kan Talingkas Film Society nasa outdoor shooting kan pelikulang saindang ginigibo ngonian.

(Photo: Chito Beronio)

Base sa pahayag ni Cano, an Talingkas Film Society magibo nin pelikula na hahamanon  asin ipapasali sa Deciembre. Ini tanganing matais an talento kan mga miembros sa iba-ibang aspeto sa paggibo nin pelikula. Dagdag pa digdi, plano kan grupo na gibohon an pinakaenot na film festival sa Partido. Ini posibleng  magsikad durante sa celebrasyon kan National Arts Month sa masunod na taon.

An festival bukas sa mga taga Partido na may interes sa paggibo nin full length movie. Si Dr. Danilo M. Gerona natukahan na magvalidate kan mga  pangculturang concepto na itatampok sa pelikula.

Mawot man ninda Baylon asin Cano na an ParSu asin an mga local na gobyerno sa bilog na Partido Area magkaigua nin collaboration sa mga actividad pangcultura na mabusol kan turismo asin madarang dagdag ingreso sa municipio.

Nanotaran ni Baylon na kun magkatuwangan an ParSu saka an mga local na gobyerno, dakula an magigin ambag sa pagparambong kan cultura asin turismo sa distrito. Dinagdag pa niya na kun mayong maglapigot sa pagpreservar kan  sadiring cultura, ini padagos nang magigin mabublay asin posibleng totalmente nang maigilid orug na kun  mayo nang mamoot asin magmakulog kaini.

Nahihiling man ni Cano an dakulaon na potential  asin talento kan mga estudiante  sa manlaenlaen na aspeto kan paggibo nin pelikula.  Magigiromdoman na kan mga nakaagin taon, an mga estudyanteng nagbale sa film competition sa luwas kan campus nakaguno nin mga halangkaw na award.

Kan nagtalikod lang  na taon an duwang pelikulang entry sa DOH-Camarines Sur Treatment Center  kan  ParSU nagin ganador sa categoriyang Best Picture, Best Director asin Best Actor.

Mientrastanto, naoogma si Baylon asin Cano na suportado ni Dr. Raul P. Bradecina, SUC III kan ParSU, an mga advocacia na saindang pigbubusol orug na an pagpadanay kan magayon asin naiibang cultura kan mga taga Partido.

An kaparehong suporta an minamawot nindang maguno man hale sa mga local na gobyerno sa Partido Area tanganing mapreservar asin maparambong an sadiring cultura kan distrito.