top of page

Partido area nakikisumaro sa kafiestahan ni Ina  

Ni Sonny Malate


SAN JOSE PARTIDO, Camarines Sur --- Arog kan kadakolon na devoto kan Nstra. Señora de Peñafrancia, an mga taga Partido Area an nakikisumaro sa pintakasi kan Patrona kan Kabikolan kada taon sa paagi kan Pèñafrancia Festival.


Consideradong pinakadakula asin enot na celebrasyon kan kafiestahan ni Ina sa Partido Area iyo an sa Sabang sa banwaan na ini.


Segun ki Padre Tito M. Oliva, Cura Parroco kan Parroquia ni St. Pedro Pio De Pietrelcina sa barangay Sabang, an celebrasyon may 20  taon na, magpoon kan itugdas an parroquia. Alagad bago pa nagin parroquia, an celebrasyon ginigibo na dati kaya posibleng labing 50 taon na ining pigrurukyaw kan mga devoto digdi.


Ngonian na ikaduwang taon nang nadestino si Padre Oliva digdi,  sa primera vez, nagkaiguang solemneng road penitential procession huli sa saiyang initiativa. Ini ginibo sa bisperas kan traslacion procession na ginigibo aldaw nin Viernes, sarong semanang enot sa celebrasyon kan Peñafrancia festival sa  ciudad kan Naga.


Afuera kaini, ngonian na taon orug na pinapusog  an tarabangan kan simbahan asin  local na gobyerno sa pamamayo ni Alkalde Jerold B. Peña.

Maritime procession ni Ina asin Divino Rostro sa kadagatan sa parroquia kan St. Padre Pio de Pietrelcina, Sabang, San Jose Partido  (Photo: Audie Concina)


Sa Septiembre 4 hasta 9, magkakaigua nin night market sa patio kan simbahan na paparticiparan kan mga local na entrepreneur. Ini sa pamamahala kan San Jose Partido Chamber of Commerce and Industry sa pamamayo ni Eddie C. Papaya.


Magkakaigua pa man kan  Banchetto de San Jose:  Alay ki Ina sa Septiembre 7-10. An Banchetto enot nang matrayumpong ginibo sa centro kan banwa kan nakaaging pirang bulan. Ini taragbuan kan tawo na pinagsararo an boot huli sa comercio, arte, musica asin kakanon. Yaon an supervision kaini kan Business Permit and Licensing Office (BPLO) sa irarom kan pamamahala ni Tirso P. Delfino, BPLO Designate kan local na gobyerno.


Gigibohon pa man an Voyadores Night sa Septiembre 9 sa kaparehong sitio. Linalaoman na an mga  actividades digdi  madagdag nin color, baskog asin entusiasmo,  mabutong nin mga turista asin madarang awmento sa ingreso sa mga local entrepreneurs.  Magigin paagi man ini na matawan nin mahiwas na exposure asin pagparambong kan talento kan mga local na musikero sa paagi kan participasyon kan mga banda.


An pinakamayor na actividad iyo an maritime (sa dagat, kun sa salog, fluvial) procession para ki Ina asin Divino Rostro sa aldaw kan Sabado. An sakay minahale sa dalhogan sa may bukana kan gilid na parte kan Lagonoy Gulf pasiring sa barangay Tagas asin pabalik sa barangay Dolo. Linalaoman na rinibong mga tawo an madagsaan sa Partido Boulevard na minaagi sa anom na barangay na nasasakopan kan parroquia.


An andas ni Ina yaon sa dakulang bangkang de motor kairiba an cura parroco, mga nangengenot na local na oficiales asin iba pang devoto. Sa likodan kaini iyo an dakol na mga sakayan na pandagat. Sa gilid kan baybayon nakahilera man an rinibong mga devoto, nagwawagayway nin panyo, maogmang nagkukuraw: Viva la Virgen! Viva! Viva! Viva! 


An maritime procession expression kan vivo asin hararom na devotion kan mga devoto ki Ina, saindang parasurog asin inspiration sa halawig nang panahon.


Magigin mayor na celebrante kan banal na misa ngonian na taon iyo si Obispo Allan Dialogo kan arsobispado kan Sorsogon, na tubong San Ramon, Lagonoy. An banal na misa icecebrar sa Talisay Port, Sitio Talisay, Dolo.


Segun ki Padre Oliva, an celebrasyon kan fiesta ni Ina  sa barangay Sabang  maicoconsiderar na ikaduwa sa pagkadakula kan pagrukyaw kaini sa ciudad nin Naga.


Afuera kan pintakasi sa barangay na ini, may mga kapareho pa man na ginigibong  celebrasyon sa haros gabos na sampolong banwaan sa Partido. 


Iba-ibang lugar- sa kapatagan, salog, dagat, magin sa irrigation canal arog sa barangay Taytay asin Napawon sa Goa! - an pag-arang, pagrukyaw asin pagkamoot kan mga Bicolano sa Patrona kan Bicol padagos asin mayong kapondohan!

コメント


bottom of page