Partido Boulevard Summer Festival ilalansar     Â
Ni Sonny Malate
Linalaoman na magigin makolor, maogma asin mahatak nin dakol na paradalan asin turista ngonian na bulan kan Abril an primerong Partido Boulevard Summer Festival.
An Partido Boulevard Summer Festival na gigibohon sa Abril 13 hasta 18 pighihiling na magigin significanteng actividad sa panahon kan tag-init asin may potential na magin mayor na tourist attraction sa Partido Area sa mga maabot na taon.
Ini an pinakaenot na dakulang actividad na gigibohon sa 13 kilometros na coastal road na naghahanggilid sa kadagatan kan Sagñay, Tigaon saka San Jose na pigdadayo na kan mga turista pira nang bulan magpoon kan ini bukasan sa publico.
An festival enot man na actividad na pagtuturuwangan kan tolong banwaan, an Sagñay, Tigaon asin San Jose. Sa mga masunod na taon, ini planong pahiwason, kairiba na an ibang banwaan sa ika-apat na distrito kan probinsya.Â
An Partido Boulevard Summer Festival suportado ninda Alkalde Chiqui B. Fuentebella kan Tigaon, Jerold B. Peña, San Jose asin Jovi B. Fuentebella kan Sagñay. Katabang pa man sinda Board Member Emmanuel F. Llaguno asin Eugene B. Fuentebella.
Si Congresista Arnie B. Fuentebella todo suporta man sa paagi nin ayuda financial para magin matrayumpo an festival na mayormenteng pigmamanehar kan mga Municipal Tourism Office asin kan Office of the Mayor kan tolong banwaan sa tabang kan mga ahencias kan gobyerno, pribado asin iba pang sector.
An nagkakapira sa mga bibong actividades digdi iyo an Zumba, Trade Fair, Kite Flying Contest, Skim Board Competition, Daralaganan para sa LGBTQ, Basketball asin Beach Volleyball. Saro man na concert an piglalaoman na magigin finale event kan festival na matampok sa popular na performe.
An Partido Boulevard sarong dakulang infrastructure project kan gobyerno nacional, may fundong labing Dos Bilyones (P2B) Pesos asin linalaoman na totalmenteng mahahaman sa taon 2026. Ini pigtutubodan na madarang significanteng karahayan sa mobility, turismo asin economia kan bilog na Kabikolan.
Mientrastanto, an iba pang mga festival asin actividades sa Partido Area ngonian na tag-init iyo an Baybayon Festival kan Sagñay, Tig-ao, Tigaon, Orgulyo Festval kan Goa asin Samhod Festival kan Lagonoy. An mga festival na ini pirang taon nang piggigibo.
Yaon pa man an Harvest Festival asin Motorally de San Jose Version 2 kan San Jose Partido na paparticiparan nin 800 na motor riders. Tampok na celebrity rider iyo an sarong bantog asin may dakolon na followers sa social media na babayeng motovlogger.
Sa Presentacion nagpopoon na man na mabisto an Abaca Festival mantang an Tinambac iguang Himoragat Festval. Sa Garchitorena igua man Foundation Anniversary kan banwaan kada Marso 4. Magigiromdoman na an Caramoan igua kan Carahan Festival alagad ini naontok huli sa pagribay kan administracion sa gobyerno local.Â
An Siruma na nanoodan nang dayohon kan dakol na turista huli sa magagayon na kadagatan asin baybayon digdi an mayong festival sagkod ngonian.
Huli sa dakulang contribusyon sa pagparambong kan cultura, turismo asin economia, asin sa pagturuwangan kan gobyerno asin pribadong sector, an mga festival asin actividades na ini piglalaoman na ini sustenido sa pagigin bibo, makolor asin madanay sa halawig na panahon.
Ini orug pa kun an mga nanunungdan na local government unit maggibo nin esfuerzos pasiring sa pag- institutionalize kaini. Dagdag pa digdi iyo an pagreconusir asin suporta gikan sa Department of Tourism (DOT) asin National Commission for Culture and the Arts (NCCA) asin ibang ahencia kan gobyerno asin pribadong seçtor.
Partido Boulevard magigin makolor asin bibo huli sa festival na gigibohon digdi sa Abril 13-18, 2024. (Photo: Carl Cj)