Partido State University host kan RSCUAA Meet 2026
Ni Sonny Malate
Goa, Camarines Sur --- Pakalihis nin 14ng taon liwat na napili an Partido State University (ParSU) main campus bilang host kan Regional State Colleges and Universities Athletic Association (RSCUAA) Meet. An makolor asin bibong actividad ginibo magpoon Octobre 12 hasta 17.
Tema kan RSCUAA Meet 2026, One Bicol, One Spirit: Inspiring Excellence, Integrity and Innovation in Sports. An taonan na dakulang actividad pigparticiparan kan siyam na mga pampublicong colegio asin universidad sa rehiyon. May total na 2,500 delegados an nagparticipar digdi.
Sa mensahe ni Dr. Arnel B. Zarcedo, Presidente kan ParSU durante sa pagbukas na ceremonia, siya nagpahayag nin maogmang pagrecebi sa mga delegados asin bisita sa sarong semanang event.
Presente sa programa iyo an haralangkaw na oficiales kan Commission on Higher Education (CHED, local government units (LGUs) asin representantes kan state college asin universidad saka man-iba- ibang ahencia.
Segun ki Zarcedo dakulaon na onra sa ParSU na magin host kan pangrehiyon na actividad. Nagpasalamat siya sa suporta kan mga oficiales kan siyam na escuelahan. Siring man, ki Alkaldesa Raquel Lim asin ibang local na hefe ehecutibo kan pagtaraid na LGUs patin comunidad.
An mga (LGUs) asin iba-ibang ahencias kan pagtaraid na banwaan sararo sa pag-extender nin.asintencia sa lado nin logistics, seguridad, traffic safety asin transportation.
An mga delegados kan anom na escuelahan an quarters yaon mismo sa campus kan ParSU. An delegados man kan tolo pang colegio asin universidad nasa luwas kaini.
Apwera sa ParSU, an mga banwaan kan San Jose, Tigaon, Sagñay asin Lagonoy ginibong venue kan mga pakawat na dae kayang maacomodar gabos digdi. Kabarali sa karawat na pigralabanan iyo an basketalball, volleyball, sepak takraw asin iba pa.
Sa lado kan seguridad, higot an suportang pinaabot kan Goa Municipal Police Station. Segun ki PCPT Jeson Max Barcenas, Acting Chief of Police, pinagmarhay nindang dae na maghagad asistencia sa Philippine Army asin grupo kan Reservists.
Imbis, mga kapulisan sa pagtaraid na banwa an nagserbing augmentation force sainda. Nakaantabay man an mga Barangay Police asin volunter groups na parating presente sa kasiribotan sa comunidad.
Napiling Mr. RSCUAA 2026 si Jose Luis Dometita kan Sorsogon State University. Si Ericabel Flojo kan ParSU iyo man an pigcoronahan bilang Ms. RSCUAA 2026. An kapangganahan ni Flojo sinabat nin kaogmahan kan bilog na comunidad kan ParSU.
Maroromdoman na kan RSCUAA Meet 2025, :an Bicol University (BU) ciudad nin Legaspi, iyo an nagin grand champion. Ngonian na taon an kampyonato liwat na naguno kan sinabing universidad.
Comments