top of page

Partido Tourism Center pighahasi  

Ni Sonny Malate


Tanganing urog pang maparambong an industria kan turismo sa Partido Area, pig-initiar kan Partido State University (PSU) San Jose, Camarines Sur campus sa paagi ni Dr. Ricky P. Laureta, campus dean, an pagkakaigua nin Tourism Center sa ikaapat na distrito kan Camarines Sur.


Kan nakaagin semana ginibo an sarong consultacion sa mga Tourism Officer kan mga banwaan digdi, Sangguniang Bayan Committee Chair on Tourism asin mga personahes kan College of Management and Tourism. Ini  nagbubusol kan paghimo kan Tourism Center para sa Partido Area.


Nanotaran ni Laureta na an Partido Area may dakulaon na potential sa industria nin turismo mantang mayaman ini sa mga magagayon na tourist destination na dakulang contribuente sa pangkagabsan na economia kan ikaapat na distrito.


Nagpahayag man nin kamundoan an campus dean na an Partido Area mayong pinagsararong policia, programa o actividad pasiring sa urog na paggantad kan turismo didgi. En vez, an kada sarong banwa iguang sadiring programang panturismo.


An bagong tourist attraction sa Partido Area. (Let’s Go Partido)



Pigtawan importancia ni Laureta an dakulaon na contribucion kan espiritu nin colaborasyon asin partnership entre kan sampolong banwaan sa pagpauswag  kan turismo. Nagtutubod an campus dean na an pinagsararong programa sa Partido Area madara nin dakulang recursos, idea asin impact sa industria kan turismo digdi.


Sa ginibong pagtiripon, an mga participantes nagtukar kan kusog, kaluyahan, oportunidad asin huma na presente sa mga ginikanan nindang banwaan. Ini titiriponon kan PSU College of Management and Tourism. 


An mga nagunong datos ipi-presentar sa mga hefe ehecutivo asin Sangguniang Bayan kan mga banwaan asin linalaoman na magigin giya sa paghaman nin mga policia dapit sa turismo.


Nagmamawot si Laureta na sa maabot na mga bulan magkakaurolay an tourism core group asin mga representantes kan local na govierno manunungod sa maninigong lakdang para sa kauswagan kan turismo digdi.


Napag-urulayan man an paggamit kan social media asin modernong teknolohiya sa marikas asin efectivong  pagpamidbid kan mga magagayon na lugar asin makawiliwiling cultura sa bilog na Partido Area.


Dugang pa kaini iyo an planong  pagpublicar nin serye nin  coffee table book na matampok kan mga makolor na festival, kakanon, gawi-gawi asin iba pang atraction kan Partido Area. Sa presente, an ikaapat na distrito kan Camarines Sur bantog sa pagkakaigua kan Samhod Festival asin Peñafrancia Regatta,  Peñafrancia Festival, Harana Festival, Baybayon Festival, Urgolyo Festival asin Santa Clara Festival. 


An magagayon na isla, kadagatan, falls asin makolor na actividades digdi an padagos na pigpupuntahan kan mga local asin dayong mga turista. Ini nin huli sa mahiwas na publicidad sa paagi kan man-ibang media flatforms. Idagdag pa digdi an madali nang biyahe huli sa mga road network na padagos na binubukasan kan govierno sa man-iba-ibang banwaan sa ikaapat na distrito.


Linalaoman man na an Partido Area an urog pang mabibisto sa tourism map kan nacion  oras na madagos na an Partido Airport sa banwaan kan San Jose Partido. An posibilidad na magkatotoo na ini iyo an pigmamawot kan kadakol na mga residentes digdi mantang pigtutobodan na magigin dalan  ini sa pag-uswag kan Partido Area urog na sa lado kan turismo.


Mientrastanto, sarong dakulang actividad sa Partido Boulevard sa bulan na Abril an pig-initiar kan local na govierno kan Sagñay, Tigaon asin San Jose. An haros sarong bulan na  actividad matampok kan man-iba-ibang vivo asin makolor na cultural, sports, environmental-related events asin iba pang atraction para sa iba-ibang sector kan comunidad.


An actividad suportado kan mga alkalde kan tolong banwaan asin kan oficina ni Congresista Arnie B. Fuentebella. Ini piglalaoman  na magigin kapinonan kan colaboracion asin partnership kan bilog na distrito sa pinagsararong actividad, programa asin policia dapit sa turismo digdi.

bottom of page