top of page

Pasacao, idedeclarang Summer Capital sa Camarines Sur

Nakasunad na sa Sangguniang Panlalawigan kan Camarines Sur an propuestong ordinansa na naghuhurot na ideclarang Summer Capital kan provincia an banwaan kan Pasacao, sakop kan segundo distrito kan Camarines Sur asin ideclarado na kan Department of Tourism bilang ‘‘Top Ten Tourist Destination’’ sa Bicol.


Si dating Alcalde kan LGU Pasacao na ngunian miembro kan junta provincial na nagrerepresentar kan segundo distrito kan Camarines Sur iyo an padreno kan ordinansa. Siya iyo an Chairman kan Committee on Tourism sa junta Provincial.


Nagtutubod an vocal na papaboran kan saiyang mga pag-iriba sa junta an propuestong ordinansa dawa na ngani maagi pa sa committee hearing antes ilaog sa en banc session bago matapos an taon na presente.


Ribo-ribo nang turista lokal man maging dayuhan pigdadayo an saindang magayon na mga beach resort, igwa pang inaapod na Daruanak sa tahaw kan kadagatan na bantogan bako lang digdi sa provincia maging sa Kabikolan asin iba pang rehiyon.


Mas lalong makakatabang sa saiyang propuestong ordinansa matapos ideclara kan opisina rehiyonal kan Department of Tourism (DOT) sa Bicol sa pamamayo ni Director Herbie Aguas an saindang banwaan bilang ‘‘top ten tourist destination’’ sa bilog na Kabikolan.


Si Pasacao Mayor Jeorge ‘‘Jojo’’ Bengua nagpahayag nin suporta asin an saindang Sangguniang Bayan mantang nag-aandam an jefe ejecutivo kan iba pang mga dokumentos nganing ipresentar sa committee hearing kan SP na dapat ideclara nang Summer Capital kan provincia.


Daruanak sa tahaw kan kadagatan sa Pasacao, Camarines Sur.

Comments


bottom of page