‘‘Pass on charges’’ kan ECs hurot haleon kan Kongreso

An Philippine Rural Electric Cooperative Association (Philreca) hinahagad na sa congreso na haleon na an mga ‘‘pass on charges’’ kan mga power supplier sa mga electric bill na bulan-bulan na pinapasan kan miembros-consumedores kan mga Electric Cooperative (ECs) nganing mabawasan an halangkaw nang tarifa.

Si Director William Basmayor kan Minalabac District kan Camarines Sur II Electric Cooperative Inc. (Casureco II) nagpahayag na saindang suportado an resolusyon kan Philreca sa tahaw kan halangkaw nang tarifa kan mga cooperativa dapat ibasura na an mga ‘‘pass on charges’’ kan mga power supplier.

An Philreca sarong organisasyon nin mga cooperativa nin electricdad na kumpuesto nin 120 ECs sa nasyon.

An Casureco II miembro kan Philreca saindang suportado an sinambit na resolusyon maging an Bicol Electric Cooperative Association (BECA) kasunod kan pagparalangkaw kan presyo kan kuryente na saindang binabakal sa mga power supplier.

Sa ngunian si dating P8.00 cada kilowatt hour kan Casureco I, II, III asin iba pang mga cooperativa nin electricidad sa Bicol nagdadalagan sa P16.00 hasta P18 sa residential. An saindang power supplier iyo an San Miguel Energy Corporation alagad mas hababa an singil sa Casureco IV sa Partido area na nagcacantidad sana nin P9.00 huli ta barato man an pabakal kan suplay nin kuryente ninda hale sa PSALM.

An ibang ECs an tarifa sa low voltage nag-aabot sa P16.76 asin sa high voltage P5.76.

Sa entrevista ki Rinner Bucay, opisyal na parataram kan Casureco II kinumfirmar kaini an mga ‘‘pass on charges’’ kan mga power supplier iyo an minasunod, general charge, system loss, transmission charge, government charge, universal charge, government subsidy charge, NGCP charge alagad an distribution supply and meeting charge na cantidad P1.53 nadalagan sa caja kan cooperative na aprubado asin regulated kan Energy Regulatory Board (ERC) puon kan taon 2002.

Sa sumada sobra pa sa sinisingil na tarifa kan ECs cada kilowatt hour.

An ibang director kan ECs nagpahayag na duda sinda na aaprubaran kan congreso an resolusyon kan Philreca mantang posibleng magreclamo naman an mga power supplier.

An paglangkaw kan tarifa kan mga ECs pigdadahilan an halangkaw man na presyo kan imported coal kan power supplier na pinapatong man sa singil sa mga cooperativa asin paglangkaw kan presyo sa produkto nin petrolyo.

Sagcod sa ngunian dai pa maaraman kan mga miembros-consumedores nin kuryente kun nuarin ibabalik sa dating tarifa sa tahaw kan padagos man paglangkaw kan presyo kan mga mayor na barakalon sa mercado asin produkto nin petrolyo. (dpa)