PATANID KAN DOH: 6 semana hasta 23 na bulan na mga aki pabakunahan vs Pertussis

An Department of Health Bicol Center for Health Development (DOH Bicol CHD), nag-apelo na sa mga magurang tanganing ilikay an saindang mga aki sa helang na Pertussis dapat pabakunahan poon sa nag-eedad nin anom na semana hasta 23 na bulan.

Ini kasunod kan kumfirmadong 21 caso kan Pertussis sa rehiyon Bicol na madaling makaulakit hasta sa 18 persona aki magin may edad na.

An DOH Bicol sa pamamayo ni Usec asin presenting Regional Director Nestor Santiago kan ahencia hagad an cooperasyon kan publico sagcod sa mga Barangay Health Workers nganing maengganyar an magurang na pabakunahan an saindang mga aki contra sa delicadong helang.

An Pertussis apektado an paghangos matapos kan sunod-sunod na pag-abo. An mga aki puedeng madidificilan maghangos sagcod na magsuka.

Kabali sa sintomas iyo an kalintura, sipon asin mga pag-abo sagcod sa saro hasta duwang semana.

Sinabi pa an siring na mga caso sa kaakian dapat ipakonsulta tolos sa pinaka haraning health center o sa saindang family doctor.

Sa pinaluwas na report kan ahencia sa Camarines Sur, igua nang siyam na caso, anom sa Albay, lima sa Sorsogon, mientras na sa Masbate naikurit an sarong caso. Mayong caso sa Catanduanes asin Camarines Norte.

Sa ngunian an aviso kan ahencia dapat parating naghuhogas nin kamot, magsulot nin face masks asin idistancia an mga kaakian magin sa matawong lugar nganing makalikay sa helang.