Patanid kan PNP: Krimen sa tinampo malangkaw

Nag-alerto an Camarines Sur PNP Provincial Office sa publico huli kan piglalaoman na paglangkaw kan krimen sa kalye ngunian na panahon nin Pasko.

Pigbabasehan kan PNP sa datus kan Deciembre 2022 sa pinaluwas na record kan Regional Investigation and Detective Management Division (RIDMD), halangkaw an mga insidente nin shoplifting, snatching, salisi asin pandudukot.

Huli kaini, an PNP Provincial Office sa pamamayo ni PD Col. Julius Caesar Domingo nagpaluwas nin patanid sa publico na dapat parating magpaseguro kan saindang personal na kagamitan siring kan alahas, relo, cellphone, pitaka asin iba pa na puedeng masalisi o ma snatch kan mga pasaway sa kalye.

Maging an mga modus operandi sa budol-budol, dugo-dugo, asin bukas kotse kinakaipuhan malikayan kan mga tawo.

Dapat magin marikmat kun naglalakaw sa tinampo orog na sa centro commercial lalo na an piglalaoman na pagdagsa kan tawo sa tahaw kan nagrarani an harahalawig na bakasyon.

Nagpaluwas pang direktiva an PNP CSur sa mga Municipal Police Station (MPS) na regular an ginigibong pagpatrolya nganing maseguro an paz y orden sa provincia.

Alagad importante an lambang namamanuan na magcooperar sa kapupulisan na isombong tolos an ano man na nangyayaring kriminalidad sa tinampo.

Kabali pa sa halangkaw an caso kun bulan nin Deciembre iyo an mga aksidente sa tinampo siring kan damage to property.

Magiging estricto pa an mga awtoridad sa ilegal na mga paputok na saro sa causa nin aksidente sa familia ngunian na panahon nin Pasko.

An awtoridad ma-monitor kan mga ilegal na pigpapabakal na mga paputok.

Igwa nang mga reglamento an local government unit asin PNP na dapat iimplementar sa kanya-kanyang LGUs.