Patanid kan PNP sa pagpaputok sa pagsabat kan bagong taon

Bako lang Department of Health (DOH), nagpaluwas man nin patanid sa publico an PNP Provincial Office sa Camarines Sur tanganing makalikay sa paputok sa pagsabat nin bagong taon.

Sa paagi kan ‘‘Ligtas Tips Ngayong Pasko’’, ini an dapat tandaan kan publico huli ta cada pagsabat kan bagong taon igwa mga na-aakisidente sa pagpaputok nin rebentador o ano man na klasing paputok na ginagamit sa pagsabat kan Pasko asin Bagong Taon, sabi ni P/Capt. Marlon Lladoc opisyal na parataram kan PPO sa CamSur.

Sinabi kan opisyal kan PNP oya an apat nindang mga patanid, 1. Dai pabayaan an mga aki na magkawat nin rebentador; 2. Dai magbakal nin ilegal o binabawal na paputok; 3. Ferming tandan an mga tamang distancia sa mga aktibong paputok; asin 4. Segurohon na dai puruton ulit an mga paputok na nagpalya asin nagkakalat sa kalye o natad kan residencia.

Sa kampanyang ini kan PNP bako lang sinda nagsusuporta sa DOH alagad kaipuhan pagirumduman an cada familia nganing dai sinda mabiktima, sabi pa.

An mga LGUs nagpaluwas nin mga reglamento sa pagtienda nin rebentador para maibitaran an disgracia.

Sa pagsabat kan Pasko, naikurit kan DOH Bicol an limang mga biktima kan rebentador na kadakli sa Ciudad nin Naga na may tolong caso na pigdara sa Naga City Hospital; duwa sa Camarines Sur pigdara sa Bicol Medical Center asin saro sa Albay dinara sa BRHMC hospital. An mga ginamit kan biktima nin klasi nin mga paputok iyo an fountain, fire star asin improvised canon.

An pagbaba kan mga caso sa paputok huli kan maigot na kampanya kan awtoridad saka DOH.

An mga biktima nakaluwas man sana sa hospital.

Mientras tanto, nagpatanid an PNP CSur sa kapupulisan na dai gamiton an saindang armas sa pagsabat kan bagong taon nganing dai mag-atubang nin disciplinary action. (dpa)