PATANID SA MGA CANDIDATO: Bawal mag-epal sa pagwaras nin payouts o ayuda-Comelec

Andam magrecibe an Commission on Election (Comelec) nin formal na reclamo alagad puede man isangat sa fiscalia contra sa arin man na mga candidato na nangbebentaje nin pagkampanya sa paagi nin pag-‘‘Epal’’ sa pagdistribuer nin PAYOUTS o AYUDA na yaon an saindang presencia sa ‘‘payout process’’.

Ini an mga pahayag ni Abogado Maico Julia Jr., Election Officer sa Ciudad nin Naga kasunod kan mga patanid ni Comelec Chairman George Garcia sa mga candidato na dapat pundohan an saindang pag-bentaje para sa maabot na eleksyon lokal asin nasyonal sa paagi kan padagos na presencia sa pagtao nin mga ayuda maging sa apektado kan mga nakaaging calamidad.

An mga candidato o politico nagpa-platica ngona sa atubangan kan mga nakapilang recipientes antes iwaras an ayuda.

Sinabi kan Comelec an ahencia na dapat magtao o magdistribuer kan PAYOUTS o AYUDA iyo an DSWD o mga opisina lokal kaini.

Ipinahayag pa na an commission nagbabantay kan saindang mga hiro sa pagbalga kan election code, ‘‘thus disqualification can either be before or even after na candidates won’’.

Iguang ibang mga politico na nakakuang fondo nasyonal maging hale sa Malacañang na ayuda para sa mga biktima nin calamidad alagad dai na pigsasabi kun kiisay hale an tabang sa mga ginigibong payouts o pagdistribuer nin relief goods.

Sa entrevista kan BM ki Election Officer Julia, sinabi kaini sa presente an mga nagsangat nin certificate of candidacy sinda mga asperante pa sana asin puedeng maapod na candidato sa panahon kan campaign period.

Alagad kun nag-eepal sinda sa ayuda puedeng sabihon na ‘‘morally vote buying’’ asin puedeng dai pa hagopon nin caso, kun nag-epekto na an campaign puedeng igua na sindang pagbalga sa election code, sabi pa.

Sa maabot na Febrero 11 hasta Mayo 10, 2025 iyo an campaign period sa mga candidato nasyonal mantang sa lokal sa Marso 28 hasta Mayo 10, 2025.