PATANID SA MIEMBROS KAN PNP: Estrictong magsunod sa social media protocol

Mandato kan Philippine National Police (PNP) na dapat magsunod sa ‘‘ethical standard’’ o regulasyon kun mawot magpaluwas nin ‘‘harsh opinion’’ o nakakabastos sa publico kaipuhan humali sa organisasyon nganing makabuelo kan anoman na gusto ipaluwas sa social media.

‘‘Igwang protocol an personnel kan PNP na kaipuhan sunodon, igwa kaming sinusunod na protocol sa pagpaluwas kan anoman na statement na mababasa kan publico.’’

Ini an mga pahayag kan Bicol PNP kasunod kan naging aksyon ni Brig. General Regional Director Bartolome Bustamante na i-relieved bilang jefe de pulicia kan Bato, Catanduanes si Capt. Ariel Buraga matapos mag-post nin mga negativong komento contra sa mag-ina na binadil gadan ni P/Master Sergeant Jonel Nuezca.

Si Alcalde Juan Rodulfo kan Bato, Catanduanes iyo an naghurot sa PNP na sipaon sa puesto an saindang Chief of Police huli kan panraratak asin negativong komento contra sa mag-inang Sonya asin Frank Anthony na pinagbabadil gadan ni Nuezca sa atubangan kan publico.

Sinabi sa media ni P/Major Marilou Calubaquid, opisyal na parataram kan Camp Semion Ola mantang siya mismo an nagtutukdo sa social media protocol aram kan miembros kan saindang organisasyon an dapat na ipaluwas na personal man o open account sa FB.

Pinahayag pa ni Calubaquib na sa mga ginigibong seminar kan PNP na saro sa pigpapaliwanag niya an mapadapit sa estrictong pagsunod kan ‘‘ethical standard’’.

Permi ko pigtataram sainda na kun gusto ninda magpaluwas sa FB Account nin ‘‘harsh opinion’’ na dai nindo masusuportaran dai na kamo mag-post ano an maitatao benipisyo saimo na daing kasegurohan, sabi pa kan opisyal na parataram kan Camp Semion Ola.

Sinabi na dapat factual lang an ipapaluwas alagad kun gusto maging opinyon an ipo-post sa social media ‘‘so be it go out with the service’’.

Sa pig-post ni Buraga sa saiyang Face Book Account: ‘‘My Father is a policeeeee Mannnnn ha!!! I don’t care eh eh eh eh eh er!!! P@#Yng ina mo gusto mo tapusin na kita ngayon???? Bang Bang Bang Bang.. Lesson Learn kahit puti na ang buhok o ubanin na tayo, eh matuto tayong rumispeto sa ating mga kapulisan... Mahirap kalaban ang Pagtitimpi at pagpasensya. RIP Nanay and Totoy’’.

An post na ini kan jefe de pulicia, inuran nin mga komento sagcod nagparalaba si reaksyon contra ki Buraga. Huli kaini, hinagad kan Alcalde kan Bato na halion an saindang COP. (DPAureus)