PATANID SA PANAHON KAN EL NIÑO: CDRRMO nag-apelar sa publico na maging bihilante sa kapalibotan

Nangapodan an City Disaster Risk Reduction Management Office (CDRRMO) kan Ciudad nin Iriga sa mga residentes na nakapalibot sa Mt. Asog na maging bihilante sa ano man na posibleng liwat na mangyaring forest fire.

Pigtutubod an nagsasarakat sa bukid na mga ‘adventurer’ iyo an dahilan kan insidente alagad dai man malinaw kun ano si ginikanan kan kalayo.

Huli kaini, si Alcalde Rex Oliva nagpaluwas nin memorandum kan Abril 21, 2024 na prohibido na ngona sa gabos na ‘‘outdoor and adventurer’’ na magpasyar sa bukid.

An cooperasyon kan publico hinagad nganing maseguro an seguridad kan kapalibotan kan comunidad nganing dai mangyari an kalayo na nagpoon sa grass fire sagcod na pigdeclarang forest fire.

An insidente nangyari kan Abril 21 alagad tolos pig-activar ni Alcalde Oliva an Incident Management Team (IMT) sagcod na nagtulak an maabot sa 200 na personajes kan Bureau of Fire Protection, volunteers, CDRRMO, asin iba pang ahencia nin awtoridad nganing magtarabangan sa paggibo nin ‘‘fire lane’’ para dai na magkalat an kalayo.

Dawa natapos na an paglaila kan kalayo asin mayo nang peligro alagad an LGUs kan Iriga asin Buhi padagos an saindang pag-monitor sa nangyaring forest fire.

An insidente apektado sa sakop na barangay kan Santiago, Santa Elena, San Juan, Sto. Domingo asin San Nicolas, gabos kan Ciudad nin Iriga mantang an mga barangays Cabatuan, San Ramon, asin De Lafe sakop kan Buhi, Camarines Sur na nag-activar man kan saindang IMT.

Kabali sa nagtarabang sa mapping operations iyo an Philippine Air Force, EDMERO Camarines Sur asin PNP Camarines Sur.