PATANID VS CASURECO II, TELCOs: City Hall maimponer penalidad kun masinutil sa Telco ordinance

Pinaagi na sa ordinansa kan Sangguniang Panlungsod kan Ciudad nin Naga nganing mag-imponer nin penalidad kun dai haharalion kan Camarines Sur II Electric Cooperative (Casureco II) asin Telcos an saindang mga poste asin linya nin kuryente asin kable na padagos na dai binabalyo nganing mahale an mga ulang sa road widening project kan DPWH asin proyekto sa infrastraktura kan City Hall.


Tolong taon pinapaagi sa urulay kan City Hall sa Casureco II asin Telcos na dapat mahale na an mga ulang sa road right of way panahon pa ni Project Supervisor/Acting General Manager Nelson Lalas, alagad sagcod sa ngunian puros pangako.


Huli kaini, sarong ordinansa numerado 2021-047 o an Telco Ordinance of Naga City na main author si Consejal Joselito Del Rosario asin pirmado na ni Alcalde Nelson Legacion na nagsusugo dapat-relocate an mga electrical post asin distribution lines, asin iba pang mga ulang na inaapod na ‘‘pancit’’ na apektado kan mga pig-iimplementar na proyekto kan 3rd Engineering District kan DPWH Camarines Sur maging kan lokal na gobierno.


An sinambit na ulang sa mga tinampo nagiging causa nin mga aksidente sa vehiculo.


Sa ordinance iyo an pagcrear nin Inter-Agency Task Force na papangenotan ni City Engineer Alexander Caning nganing sa dai mahahaloy magsikad na an implementasyon kan ordinansa.


Kun padagos sinda na masinutil mapipiritan an City Hall na mag-imponer nin penalidad.


Sa lado kan Casureco II, sinabi ni spokesperson Rinner Bucay na nakatalaan mag-urulay an opisyales kan cooperativa asin hahalaton ninda an kopya kan ordinansa.


Sinabi ni Bucay na sa parte kan saindang manijamiento preparado na mag-relocate kan mga poste alagad an dapat basulon iyo an mga Telcos na apesar perang veces nang pinadarahan ni noticia nganing haralion an mga kable dai man nagsusunod.


Kun pipiriton kan City Hall na papatawan sinda nin penalidad nakatalaan nindang cuestionon sa jusgado an ordinansa sagcod na maghagad nin temporary restraining order, sabi pa. (DPAureus)