PATANID VS MGA CANDIDATO: Pagbayad sa PTC, PTW binabantayan kan PNP

An Philippine National Police sa Bicol nagpapatanid sa mga candidato na dai magbayad nin anuman na kontribusyon sa Communist Party of the Philippine/New People’s Army (CPP/NPA) ngunian na karampanyahan sa eleksyon lokal asin nasyonal mantang ini an pagkakataon kan mga kalaban kan gobierno nganing magsingil kan permit to campaign (PTC) asin permit to win (PTW).


Cada eleksyon ini an nakaka-abot na intelligence report sa PNP maging sa Philippine Army alagad sinda ma-monitor kan ano man na hiro kan mga candidato na magbayad kan PTC asin PTW nganing maseguro sana an saindang kapangganahan sa pirilian.


Si Brig. Gen. Jonnel Estomo, regional director kan Bicol PNP nagpahayag na saindang pigsusubaybayan an mga candidato mantang ano man na ibabayad ninda sa PTC asin PTW kunsideradong ilegal nin huli ta kalaban kan gobierno an saindang sinusuportaran.


An intelligence report kan militar milyones peso an nakokolekta kan mga rebelde kan mga nakaaging eleksyon asin dapat dai ini mangyari ngunian asin puedeng sangatan nin caso an arin man na candidato, sabi pa kan Bicol PNP.


Sinabi pa na kun kaipuhan kan candidato maghagad nin security protection sa saindang pagcampanya sa mga barangay dapat magkua sana nin permit.


Kun madali na an eleksyon an CPP/NPA napaheling kan saindang fuersa sa paagi kan pag-aataki sa tropa kan gobierno nganing patubudon an mga politico na nagdadanay pa an rebeldeng grupo nganing magbayad kan PTC asin PTW.


Saro sa naheheling kan PNP iyo an nangyari kan Febrero 1 pinagbabadil gadan an sarong opisyal kan San Miguel Municipal Police Station sa Catanduanes mantang maserbe nin mandamiento de aresto sa number 1 provincial wanted person sa Sitio Tucao, Barangay JMA, alagad na-enotan sa putok an mga pulis mantang si limang kaibanan nag-atras pasiring sa residencia kan barangay kapitan.


An pang-aataki sa PNP, kinundenar ni Bicol PNP Chief Brig. Gen. Jonnel Estomo mantang an misyon kan biktimang pulis arestaron an wanted person.