Patiribayan sa paghagot tampok sa Abaca Festival sa Presentacion
Ni Sonny Malate
PRESENTACION, Camarines Sur --- Gigibohon liwat an maconsuelo asin bibong pacontest sa mano-manong paghagot nin abaca sa ika-pitong taon na celebrasyon kan Abaca Festival sa banwaan na ini sa Junio 8 hasta 13, 2023.
Segun ki Ebenezer Presentacion, Municipal Planning Development Coordinator asin Chairperson kan cometiba sa Abaca Festival, an maogmang patiribayan sa lumang sistema nin pagkua nin bandala (abaca fiber) sa hawak nin abaca saro sana sa mga kinakawilihan sa mga makolor na actividades katakod kan pakamundag kan banwaan asin pintakasi kaini bilang pag-onra sa Santo Patron, San Antonio de Padua.
Kabale sa makolor na mga actividades ngonian na taon iyo an Street Parade Competition, Gayon Boses Singing Competition, Laro ng Lahi, Search for Binibining Presentacion, Blood Letting Activity, Mayor’s Cup Basketball Tournament, Street Dance Competition asin an Grand Opening kan Pasalubong Center.
An mga tinanom na abaca sa Presentacion na yaon sa 508.48 hectarias sa parteng kapatagan saka kabukidan, ikaduwa sa mayor na produktong niyog na nag-oocupar nin 4,932.04 hectarias sa kagabsan na daga kan banwaan.
Ikapitong taon na celebrasyon kan Abaca Festival. (LGU Presentacion)
An productong bandala na gikan sa Presentacion dakulang burabod nin pagbuhay kan mga residentes digdi. Ipinapabakal ini kun bakong mismong sa banwaan na ini, sa pagtaraid na lugar kan Lagonoy, San Jose asin Goa.
An bandala na gikan sa hawak kan abaca matibay na material na ginigibong lubid na gamit sa mga sakayan pandagat. Siring man, an upak kaini nagigin material sa mga native handicrafts asin adorno na mabenta sa local asin international na mercado.
Dae pa sana nahahaloy, an mga native products kairiba an gibo sa abaca, na hale sa Presentacion, ibinale sa DTI Trade Fair sa ciudad kan Naga kan nakaagin semana. Ini sa paagi kan Presentacion Negosyo Center na bilog an suporta ni Alkaldesa Alicia A. Deleña.
Mientrastanto, ipinahayag ni Engr. Elias Bhoy Bacus Indico, Jr., Municipal Tourism Officer Designate, na nagdagdag an tourist arrival sa Presentacion ngonian na tag-init urog na kan bulan na Abril kan Semana Santa.
An mga tourist destination na pigdadayo iyo an Coastline Nature Resort asin CesarzVille Farm Resort, pareho sa barangay Sta. Maria asin Bahao Falls, sa barangay Baliguian.
Segun ki Indico, sa presente an Presentacion arog kan kadaklan kan mga banwaan sa Partido Area, mayo pang nahimong sadiring Municipal Tourism Development Plan.
Piglalaoman na oras na magkaigua nang arog kaining plano an mga local na gobyerno digdi mas magigin marikas an pagrambong kan turismo digdi na macontribuer sa dagdag na ingreso sa kaban kan gobyerno.